Sport.cw

Sponsored by

Sponsored by

Sponsored by

Xaverianen ta sigui gana

Xaverianen a kuminsá e semi final manera ela terminá e kampionato regular den klase superior maskulino. E tim a superá Green Tigers ku skor di 3-0. Den superior femenino Stakamahakchi ku a kaba na promé lugá tambe a triunfá den e promé wega di semi final derotando Hurricane ku 3-1.

Despues ku Federashon Vòlibòl di Kòrsou (FeVoKo) siman pasá djadumingu a klousurá e kampionato regular den klase superior, awe djadumingu 11 di mart a kuminsá e weganan di semi final. Tabatin un total di kuater enkuentro den sala kubrí Errol Rooi di Sentro Deportivo Kòrsou (SDK) na Brievengat.

E semi final ta konsistí den tantu femenino komo maskulino den un seri mihó di 3 wega, Pues e tim ku gana promé 2 wega ta sigui pa final den kada kategoria. E ekipo number 1 ta hunga kontra number 4 i number 2 ta topa number 3 den e serinan aki.

Xaverianen ku terminá sólido na promé lugá den klase superior maskulino, a gana tambe su promé den semi final. Ela superá Green Tigers ku a keda na di 4 puesto den kampionato regular, ku skor di 3-0. E parsialnan tabata: 25-19, 25-22 i atrobe 25-22.

Den e otro semi final den klase superior maskulino Watakeli ku e tèrminá na di 2 lugá den kampionato regular, a gana ku skor di 3-1 di Stakamahakchi. E timnan a batayá durú kontra di otro. E parsialnan tabata 25-20, 25-20, 22-25 i 25-22 na fabor pues di Watakeli.

Den klase superior femenino Stakamahakchi ku a kaba e kampionato regular na promé puesto a superá Hurricane ku skor di 3-1. Despues di a sali gana e promé dos sètnan ku parsial di 25-22 i 25-17, Stakamahakchi ta pèrdè e di tres sèt ku 18-25 pa despues gana e di kuater sèt ku 25-12 i asina bai dilanti den e seri mihó di 3 wega.

Den e otro wega di semi final den klase superior femenino Shuatanari ku a tèrminá na di dos lugá den kampionato regular, a pasa den tres sèt riba Watakeli (number 3): 3-0. Remarkabel tabata ku e di tres sèt a keda fuertemente disputá. E parsialnan tabata 25-18, 25-17 i 29-27.

E weganan di semi final ta kontinuá mañan djaluna 12 di mart ku enkuentronan den klase A. Den kategoria femenino tin e weganan Shuatanari vs Watakeli i Hurricane vs Stakamahakchi, miéntras ku e enkuentronan maskulina ta Green Tigers vs Stakamahakchi i Green Tigers vs Titus.

 

 

 

 

 

Translate »