Marchena Braves ayera, djaweps 13 di sèptèmber 2018, a gana di chiripa di Groot Kwartier Stars Mangusa: 5-4. Despues di tabata pèrdí 3-4, e tim den último inen via di homerun di Rochendrick Alexander a hinka 2 kareda i asina laga e Streanan di Kwartí den tereno: 5-4.
Marchena Braves, Groot Kwartier Stars i Sta Rosa Indians ENNIA/Jeep a kaba kampionato regular empatá na di tres puesto ku 16 triunfo i 20 wega perdí. Awor nan ta hunga un seri di weganan di deskite pa disidi kua tim ta klasifiká number 3 i 4 pa ‘play-off’.
E promé wega dje seri di deskite a tuma lugá den Tio Daou Ballpark na Sapaté i a bai pues entre Groot Kwartier Stars i Marchena Braves. E Streanan di Kwartí a bai dilanti ku 2 kareda den di dos inen. E tim di Marchena a kòrtá e ventaha ei ku 1 kareda den su di tres turno na bate: 1-2.
Groot Kwartier den di 5 inen a ampliá su ventaha ku 1 kareda (3-1), pero den bòm di mesun entrada Braves a skor 2 kareda pa hasi esaki 3-3. Den di shete inen atrobe e Streanan di Kwartí a bai dilanti (4-3) i tabata mustra di ta bai gana e wega. Marchena sinembargo ku 2 kareda den di nuebe alabes último inen a skor 2 kareda i laga e kontrinkante den tereno: 5-4.
Picher Nahim Attaf a gana e wega. Ela drenta di relevo den di shete inen na lugá di Joel Suares. Attaf durante 3 entrada no a pèrmití kareda na Kwartí, despues ku picher habridó Suares den 6 inen a haña 4 kareda kontra riba 6 hit i a dal 3 hungadó ku bala.
Mihó bateadónan pa Marchena Braves tabata mesun picher Nahim Attaf i Rochendrick Alexander. Attaf tabata bon pa 3 hit den 4 turno i ela empuhá 2 kareda. Alexander a dal 2 hit den 5 turno, di kua 1 homerun i e tambe a empuhá 2 kareda. E homerun aki tabata ku un koredó riba base i pues bon pa e 2 karedanan pa laga Kwartí den tereno.
Picher Jeanmarc Castillo a karga ku e derota. Ela drenta den di nuebe inen di relevo pa Shaquille La Croes ku durante 8,1 entrada a pèrmití 4 kareda riba 9 hit. Castillo no por a kontrolá Rochendrick Alexander ku a dal su bala bula waya pa un homerun di 2 kareda pa kaba wega.
Sander Boeldak i Argenis Daal tabata e mihó bateadónan pa Groot Kwartier Stars. Boeldak a dal 3 hit den 5 turno, miéntras ku Daal tabata bon pa 2 hit den 5 turno i 1 kareda empuhá.
E seri di weganan di deskite ta kontinuá mañan djasabra 15 di sèptèmber ku e wega entre Sta Rosa Indians i Groot Kwartier Stars. Esaki ta kuminsá mitar di 8 i ta tuma lugá den Stadion Johnny Vrutaal riba Ref, esta den Otrobanda.
