Sta Rosa Stars ayera, djaweps 13 di sèptèmber 2018, a logra su di 11 triunfo den divisishon B di Curaçao Futsal Federation. Ela logra esaki goliando Fabarma FC ku skor di 15-1. Den divishon A a konkistá su di 23 punto biniendo djatras pa derotá Pantera Negras 3-2.
E kampionato di futsal lokal a kontinuá ayera den sala kubrí Niels Liberia di Stadion Odulio Willems na Suffisant. Tabatin 2 wega den divishon máksimo i 1 enkuentro den divishon B.
Sta Rosa Stars no tabatin niun tiki kompashon ku Fabarma FC den divishon B. For di komienso tabata bisto ku e enkuentro ta bai kaba ku skor abultá. E promé tempu a terminá ku Sta Rosa den ventaha: 7-0. Norvianel Naar i Jurensley Martina a skor kada un 4 gol. Cristopher Isenia a hinka 3 gol, miéntras ku Quentley Sophia i Norman Hoyer kada un tabata bon pa 2 gol. E úniko gol pa Fabarma a keda di skor pa Iverich Gregorio.
Ku e viktoria riba Fabarma FC, Sta Rosa Stars a bira e promé ekipo pa gana 11 enkuentro. E tim tin sinembargo 1 wega mas hungá ku FC Securitas Antias ku ta komandá e tabla di posishon ku 24 punto for di 15 enkuentro: 10 viktoria, 4 empate i 1 derota. Sta Rosa tin 23 punto for di 16 wega: 11 triunfo, 1 empate i 4 derota.
Den divishon A kampion FC San Lucas a registrá otro triunfo. Ela superá Pantera Negras ku skor di 3-2. E tim nobato a bai dilanti 1-0 den promé tempu i tabata parse di bai sòru pa un sorpresa. Pero den di dos tempu FC San Lucas a hinka 3 gol kontra 1 dje tim kontrinkante pa gana tòg finalmente.
Den e otro wega den divishon A Ocean View FC a gana ku skor di 4-2 di FC RO Family. E golnan dje tim ganadó tabata di Stallone Isenia, Dexter Cicilia, Kevin Lodovica i Harley Djaoen. E golnan kontrali tabata di Raylon Eugenio i
Germain Permit.
E resultadonan aki ta nifiká ku FC San Lucas ta keda na kabes dje tabla di posishon, awor ku 23 punto for di 14 wega. Ocean View FC ta subi bai okupá e di dos lugá ku 17 punto for di 14 wega.
