Marchena Braves a empatá e seri den semi final di beisbòl dòbel A -konosí komo Liga Aqualectra- kontra Wild Cats Guardian Group/KJ74: 1-1. E tim bou di direkshon di manager Chado Obispo a nòkout e kampion di Kòrsou ku skor di 15-3.
Federashon Beisbòl di Kòrsou (Febeko) a sigui ayera ku e di dos enkuentro den ‘play-off’ entre Wild Cats i Marchena Braves, ku a tuma lugá den Stadion Johnny Vrutaal, Otrobanda. E Pushinan Brabu a tèrminá kampionato regular na promé puesto i Marchena na di 4 lugá.
Wild Cats a sali hinka 2 kareda den promé inen, pero Marchena Braves den bòm dje di dos entrada a skor 5 kareda: 5-2. Den nan di tres turno na bate e Pushinan Brabu a hinka 1 kareda, ku despues a resultá di ta tur kos pa e anochi: 3-5.
Ku 3 kareda den di kuater inen, 5 den di sinku i 2 kareda den di seis inen, Marchena Braves a nòkout e kampion di Kòrsou: 15-3. E tim a bati 13 hit, miéntras ku Wild Cats a hasi 8 eror ku tambe a kosta e ekipo karedanan kontra.
Picher Risandro Pastor a habri riba montíkulo i a bai 4 inen. Ela pèrmití 3 kareda riba 3 hit. Ela ponchá 5 bateadó i duna 3 ‘base por bola’. Nahim Ataf a relev’é den di sinku inen i a bira e picher ganadó, pasobra Pastor a sali promé ku e wega a bira legal. Ataf no a pèrmití kareda, pero wel 2 hit miéntras ela ponchá 2 bateadó.
Den e wega di ayera tur hungadó di Marchena Braves a bati hit, pero Risandro Pastor, Reyhan Fecunda i Rochendrick Alexander tabata esnan ku mas a sobresalí. Fuera di a pichá bon, Pastor a bati 3 hit den 4 turno, skor 3 kareda i ku un di su batasonan tambe hinka un koredó aden. Fecunda i Alexander tur dos a bati 2 hit den 4 turno.
Pa Wild Cats picher Carol Servania a pèrdè e wega. Den 4 inen ela pèrmití 10 kareda riba 8 hit, di kuá 3 kareda tabata sushi. Ela ponchá 3 bateadó i duna 5 ‘base por bola’. Swenton Martina a drenta den di 5 inen na lugá di Servania i a pèrmití 5 kareda riba 5 hit di kuá 2 kareda tabata sushi.
Randolph Kirindongo ku 2 hit den 3 turno tabata e mihó bateadó pa Wild Cats. Yurendell de Caster i Luisgardo Alvarez tambe a bati 2 hit pero den 4 turno.
E weganan di semi final ta sigui awe’nochi ku Sta Maria Pirates Chippie kontra di Sta Rosa Indians ENNIA/Jeep. Den e seri aki e Indjannan ta 1-0 dilanti. E enkuentro aki ta kuminsá mitar di 8 den Tio Daou Ballpark.
