Wild Cats Guardian Group/KJ74 a bolbe empatá e seri final kontra di Sta Maria Pirates Chippie na 2-2. E kampion di Kòrsou awe, djamars 23 di oktober 2018, a gana den inen èkstra: 3-2.
E di kuater enkuentro di final entre Wild Cats i Sta Maria Pirates tambe tabata duru bringá, ku hopi tenshon i emoshon. Umpire dado momento a ekspulsá mènedjer di Sta Maria, miéntras esun dje Pushinan Brabu kasi tambe a kore mesun riesgo.
Tabata e Piratanan ku den di tres inen a skor 2 kareda kontra Ruderly Manuel despues di 1 out. Nan tabatin un tripel i hitnan oportuno. Despues e picher habridó a rekuperá e ponchá dos bateadó pa sali for dje entrada.
Den kabes dje di kuater entrada, Wild Cats a yena base ku 2 out. E turno a kuminsá ku dos bataso di hit, di kua un a dal den e picher i e otro tabata un ‘fly’ kòrtiku den ‘outfield’. Picher Richene Martina despues a dominá dos bateadó ku ‘fly’ pa despues duna un ‘base por bola’ i yena base.
Na konteo di 2 ‘bola’ i 2 ‘strike’ Ardley Jansen ta bati e bala duru i largu pa ‘outfield’. E umpire ku tabata leu fo’i dje hugada tòg mesora a kanta homerun i pues e wega a bira 4-2 pa Wild Cats. Sinembargo e ‘outfielder’ Pirata tambe mesora a grita i hasi seña ku e bala a pasa den waya i no riba e waya i aki a sigui protesta fuerte dje mènedjer di Sta Maria. pero e umpire a para riba su desishon i a sak’é fo’i wega.
Otro tèknikonan tambe a protestá i a pidi e orei e umpire prinsipal pa reuní riba e protesta. Despues di reuní, e tim di umpire a kambia e desishon di homerun pa doblete i pues anulá e grandslam di Jansen. Esaki a pone ku mènedjer di Wild Cats tambe a bira furioso i reklamá fuerte te ku koleganan a bai ku n’e pa umpire no saka e tambe fo’i wega. Finalmente for di einan e kampion di Kòrsou a sigui hunga pero bou di protesta.
E enkuentro a yega di nuebe inen empatá na 2 kareda i pues a pasa pa hunga èkstra inen. Wild Cats a skor 1 kareda den su di 10 turno na bate i despues a saka 3 out pa gana asina gana e wega (3-2) i empatá e seri na 2 wega pa banda.
Picher ganadó tabata Richard Moesker ku a drenta den di nuebe inen na lugá di Kennimar Martina ku na su turno a relevá picher habridó Ruderly Manuel den di shete inen. Manuel a pèrmití 2 kareda i 7 hit den 6,1 inen. Ela ponchá 9 bateadó. Martina a pèrmití 1 hit sin kareda i Moesker tampoko a pèrmití kareda ni hit.
E mihó bateadónan pa Wild Cats tabata Yurendell de Caster i Ardley Jansen. De Caster a bati 2 hit den 4 turno, miéntras ku Jansen tabata bon pa 1 hit den 3 turno i tur 3 kareda empuhá.
Picher Jonathan Balentina a pèrdè e wega pa Sta Maria. Ela drenta di relevo den di 8 inen na lugá di Gedryon Basilia ku na su turno a relevá picher habridó Richene Martina den di 3,2 inen. Martina a pèrmití 2 kareda riba 4 hit. Basilia den 2,2 inen a haña 2 hit kontra sin kareda, miéntras ku Balentina den 3 inen a pèrmití 1 kareda riba 3 hit. Finalmente Raydel Isabella tambe a mira akshon riba montíkulo i no a pèrmití nada na Wild Cats.
Porsierto ku Raydel Isabella a sobresalí tambe na bate. Ela dal 3 hit den 4 turno. Sherman Lacrus a bati 2 hit den 4 turno, entre kua un tripel. E bateadónan di Sta Maria a ponchá na 12 okashon.
E seri final ta sigui djaweps, 25 di oktober 2018, ku e di 5 wega. Esaki tambe ta tuma lugá den Tio Daou Ballpark i ta kuminsá 8’or.
