Sport.cw

Sponsored by

Sponsored by

Sponsored by

Pirates a pika dilanti atrobe

Sta Maria Pirates Chippie a bolbe tuma ventaha den e seri final di kampionato di beisbòl dòbel A. E tim ayera, djaweps 25 di oktober 2018, a humiá Wild Cats Guardian Group/KJ74 ku skor di 12-1 i falta awor un triunfo mas pa titulá kampion di Kòrsou.

E seri final entre Wild Cats i Sta Maria Pirates a sigui ayera’nochi k’e di sinku wega den Tio Daou Ballpark. Wild Cats ta aktual kampion.

For di trempan e Piratanan a tuma ventaha i no a desperdisiá esaki. Ku 1 kareda den promé i di dos inen i despues 2 den nan di tres turno (4-0), tabata visto ku Sta Maria tabata riba kaminda pa su di tres viktoria. Esaki pa motibu ku picher Johan Rifaela tabatin e batiadónan bon dominá riba apenas 1 hit den tres inen di trabou.

Kontrali n’e Pushinan Brabu, e batiadónan di Sta Maria tabatin fiesta di bataso oportuno. Nan a eksplotá den ku 4 kareda den tantu di 5 komo di 6 inen i pone e wega riba eis: 12-0. Tur esaki miéntras ku picher Rifaela no tabata pèrmití kasi nada n’e tim kampion, ku esepshon dje di sinku inen kaminda Wild Cats a yená base pero sin por a skor.

Despues ku Sta Maria a tuma ventaha di 12-0 den kabes di inen 6, awaseru a bira kai duru. Esaki sinembargo a dura kòrtiku i e wega por a sigui. Tabata den bòm di mesun inen ku Levi Carolus a kibra e blankeo di picher Rifaela, ora ku ela bati un homerun: 1-12.

Rifaela a gana e wega. Durante shete inen ela pèrmití 1 kareda riba 4 hit. Ela ponchá 4 batiadó i a duna tambe 4 ‘base por bola’. Mihó batiadónan pa Sta Maria Pirates tabata Sherman Lacrus, Ulrich Snijders, Johannes Jr Gregorius i Rayshelon Carolina. Lacrus a dal 3 hit den 4 turno. Snijders tabata bon pa 2 hit den 3 turno, entre nan 1 homerun i ela empuhá 4 kareda. Gregorius a bati 1 hit den 2 turno, miéntras ku Carolina tabatin 2 hit den 4 turno.

Picher Richinell Matos a pèrdè e wega pa Wild Cats. Den 4,1 inen ela pèrmití 8 kareda di kuá 5 tabata limpi i 8 hit. Den di sinku inen ela traha lugá pa Geedion Jacob ku no a pèrmití kareda ni hit. Carol Servania a subi montíkulo den di seis inen i a pèrmití 4 kareda riba 4 hit bou di kua e homerun di Snijders.

E seri final ta kontinuá djasabra, 27 di oktober, atrobe den Tio Daou Ballpark.

Translate »