Sport.cw

Sponsored by

Sponsored by

Sponsored by

Sòfbolistanan pa Aruba

Kòrsou ta kompetí e aña aki tambe den e Women’s Softball South American Championship 2018. E selekshon femenino a viaha awe mainta, djabièrnè 26 di oktober, pa Aruba kaminda e kompetensia ta tuma lugá. E biaha aki sí e picher Leonella Elizabeth ta forma parti dje tim lokal.

Na Aruba ta tuma lugá di 13 edishon dje Women’s Softball South American Championship. Esaki ta kai bou di World Baseball and Softball Confederation (WBSC). E kompetensia ta kuminsá mañan djasabra 27 di oktober i ta dura te ku 3 di novèmber.

Leonella Elizabeth, kontrali na último dos kompromisonan internashonal, e biaha aki sí ta forma parti dje selekshon femenino di Kòrsou. Anteriormente e tabata miembro klave dje tim di sòfbòl Hulandes i a guia esaki porsierto tambe na konkistá e titulo Oropeo. E último dos añanan ela militá den Sta Rosa Angels Vanddis i guia e tim aki na dos titulo kampionil di Kòrsou.

Huntu ku pichernan estelar Arnalda Margaritha di Pichingolo Nissan i Richelle van Gennip di Eagles Softex, Leonella Elizabeth ta bai purba di gana dje otro selekshonnan. Fuera di Kòrsou lo kompetí na Aruba tambe selekshonnan di Venezuela, Peru, Argentina, Brazil i Aruba komo anfitrión. Na último momento Colombia a kanselá su partisipashon na e kampionato regional aki.

E selekshon di Kòrsou ta formá pa 17 sòfbolista i 4 tèkniko. E hungadónan ta: Arnalda Margaritha, Richelle van Gennip, Angelique Antonio, Shurvienska Wawoe, Kimberly Agard, Julisse Koffy, Chantal Nepomuceno, Xiaryse Emerenciana, Shanysse Emerenciana, Suheydi Faneyt, Genevieve Hariquez, Deidra da Costa Gomez, Michenou Marselia, Le-Ann Craanberg, Jandely Ricardo, Tsade Tjoubert i Leonella Elizabeth.

Manager dje selekshon di Kòrsou ta Gustavo ‘Taffy’ de Jong i e entrenadónan ta Wendley ‘Chapè’ Bernardus, Patrik Girigori i Marvin Wijman. Fisioterapista Neldruck Lourens tambe a viaha pa Oranjestad, miéntras ku Lernnerth Angela ta fungi komo hefe di delegashon. E ta tambe e aktual presidente di Curaçaose Softball Bond (CSB).

Translate »