Despues di entrega di premionan di temporada 2017/2018, tur kos ta kla atrobe pa kampionato regular nobo di futbòl lokal ranka sali. E promé wega den promé divishon, esta Liga MCB, ta djadumingu 28 di oktober 2018 entre Jong Holland i Sport Unie Brion Trappers (SUBT).
Promé k’e kampionato nobo Federashon Futbòl di Kòrsou (FFK) a organisá entrega di premio korespondiente na temporadá pasá. Esaki a tuma lugá djamars 23 di oktober den edifisio di Abvo na Brievengat.
E anochi di premiashon aki tabatin e titulo ‘A Night in China Town’ i tabata dediká na baluartenan Egon Schoop, Frits Meursing, Hubert Braafhart, Donald Seferina i Humphrey Ignacio. Durante e evento a anunsiá entre otro futbolista, dirigente i arbitro di aña.
Charles Martina di Jong Holland a gana e premio di futbolista di aña den Liga MCB. E otro nominadonan tabata Edel Daal di Vriendschap Eendracht Sterken Tegen Alles (VESTA) i Juan Londoño Villa di Jong Holland. Jong Holland ku a sali kampion di Kòrsou a gana e premio tim di aña.
Djadumingu e kampionato regular ta ranka sali ku pues e wega entre kampion di promé divishon Jong Holland i kampion di segundo divishon SUBT. Pues e tim di Kintjan despues di a degradá a bolbe subi e aña’ki pa divishon máksimo di FFK. E enkuentro aki ta kuminsá 6’or di atardi den Stadion Ergilio Hato di Sentro Deportivo Kòrsou (SDK) na Brievengat. E aña aki tambe lo hunga algun wega den Stadion Antione Maduro na Kintjan.
E sigiuente timnan ta kompetí kontra di otro den Liga MCB: Jong Holland, VESTA, Union Deportivo Bandabou (Undeba), Inter Willemstad, Scherpenheuvel, Centro Dominguito, Victory Boys, Centro Social Deportivo Barber, Jong Colombia i SUBT. Hubentut Fortuna a degradá pa segundo divishon.
E kompetensia den Liga MCB ta dediká na e sigiuente baluartenan: Donald Gosepa, Lesly Melfor, Hector Weert, Rolando Goeloe i Eulogio Leocadia. Gosepa i Melfor ta èks hungadonan di futbòl. Weert den pasado a fungi komo rèfri, Goeloe antes tabata dirigente atministrativo i Leocadia tabata masahista.
Relashoná ku apertura dje kampionato nobo djadumingu, portanan di Stadion Ergilio Hato lo habri for di 4’or di atardi. Karchi ta optenibel mesun dia na lòket dje kompleho deportivo. E ta kosta 10 florin pa hende grandi i 2 florin i 50 sèn pa muchanan di 6 pa 12 aña i tambe pa personanan di 60 aña i mas.
Riba kombinashon di fotonan por haña un impreshon dje evento ‘A Night in China Town’ di FFK, kaminda a premiá entre otro hungadónan, timnan, dirigentenan i ofisialnan den tur e divishonnan di futbòl lokal.
