Wild Cats Guardian Group/KJ74 a bini djatras pa gana di Marchena Braves di chiripa: 7-6. Esaki despues ku e supkampion di Kòrsou ayera, djarason 24 di yüli 2019, tabata pèrdí 6-0 despues di 2 inen.
E kampionato di beisbòl dòbel A den Liga Aqualectra a kontinuá ayera den Stadion Johnny Vrutaal na Rif, Otrobanda.
Marchena Braves a skor 1 kareda den su promé turno na bate i despues a eksplotá ku 5 kareda den di dos inen pa pika dilanti: 6-0. E Pushinan Brabu ku 2 kareda den di tres inen a hasi e diferensia mas chikí. Den di seis inen e tim supkampion di Kòrsou a skor 4 kareda pa empatá e wega: 6-6.
Ku 1 kareda mas den su di shete turno, Wild Cats a seya e viktoria. E tim di Marchena despues dje di dos inen no a skor niun kareda mas.
Picher Richard Moesker a gana e wega. Ela drenta den di 7 inen di relevo i a pèrmití solamente 1 hit sin kareda. Geedion Jakob a kuminsá riba montikulo i den kuater inen a pèrmití 6 kareda riba 8 hit. Den di sinku entrada ela haña relevo di Kennimar Martina ku a bai 2 inen i finalmente Moesker.
Levi Carolus i Terrence Josephina a destaká den kaha di bateo pa Wild Cats. Tur dos a bati 2 hit den 3 turno.
Picher Rayshel Servinus a pèrdè e wega pa Marchena Braves. Ela remplasá picher habridó Frensly Leito den di seis inen, despues ku esaki a pèrmití 6 kareda riba 7 hit den 5 inen di trabou. Servinus sinembargo tabata esun ku a pèrmití e di 7 kareda di Wild Cats.
Rochendrick Alexander tabatin un anochi perfekto na bate pa Marchena Braves. Ela bati 3 hit den 3 turno. Jonathan Martijn tambe a sobresalí ku 2 hit den 3 turno.
E kampionato den Liga Aqualectra ta sigui awenochi, djaweps, ku e enkuentro entre Royal Scorpions Mr Baseball My Malls i Fire Birds Skènikèsh. E wega ta kuminsá mitar di 8 den Tio Daou Ballpark.
