Centro Social Deportivo Barber ta e úniko tim ku den e seri di wega den wikènt a gana. Ela superá Sport Unie Brion Trappers (SUBT) ku skor minimo: 1-0. Sobrá kuater enkuentronan, entre otro e klásiko entre Union Deportivo Bándabou (Undeba) i Centro Dominguito, a sali empatá.
E kampionato di futbòl lokal, organisá pa Federashon Futbòl Kòrsou (FFK), a kontinuá den wikènt. Tabatin kuater wega den promé divishon, esta Liga MCB, ku a tuma lugá den Stadion Ergilio Hato, Brievengat.
For di djabièrnè Centro Dominguito i Undeba a topa otro i den un bunita wega a tabla 0-0. Pa motibu di fayo den komunikashon i malkomprendementu, Sport.cw tabatin ku para e transmishon bibu dje wega aki.
E kampionato den Liga MCB a kontinuá djasabra ku dos wega. Victory Boys i CVV Willemstad a empatá un gol. Gedison Zink na di 21 minüt a pone Victory Boys ariba, miéntras ku Gersino Constancia na di 45 minüt a skor e gol di empate pa Willemstad.
Den e otro enkuentro Jong Holand i Skèrpènè tambe a parti punto. Na apenas 5 minüt di wega Jursley Kroonstadt ta skor pa e ’trikolornan’, miéntras ku Christopher Isensia na di 55 minüt ta empatá e wega pa Skèrpènè.
Awe, djadumingu, tambe tabatin dos enkuentro. E tim di Vriendschap Eendracht Sterken Tegen Alles (VESTA) a tabla na 1 gol ku Fortuna Kurá Piedra. Na di 13 minüt Darlijson Ellensburg a habri skor pa e kampion di Kòrsou, miántras ku Johenry Lloyd na di 74 minüt a hinka e gol di empate pa Fortuna.
Den e di dos wega awenochi Centro Barber a superá SUBT ku skor di 1-0. E úniko gol dje enkuentro a kai na di 60 minüt. Esun responsabel pa esaki tabata Faron Troeman.
