Dimitri Leon a konkistá su di 7 titulo kampionil di pinpòn di Kòrsou. Ela superá den final di divishon Senior Devon Meilink ku skor di 4-1. Den divishon B Mary-Ann Mac Leod a sali kampion ganando ku skor di 3-0 di Cai Walters.
Federashon di Tènis di Mesa Kòrsou (FTMK) siman pasá tabatin e bueltanan preliminar di su kampeonato nashonal. E kompetensia tabata dediká Onnie Wong, ku ta un miembro di hopi aña. E tabata un hungadó ku a hunga pinpòn durante diferente dékada for di añanan 60 te na final di 90.
Henter siman pasá tabatin pues pinpòn den kuater kategoria, esta B-klas, Master, Dòbel i Senioren, ku partisipashon di 60 hungadó, bou di nan 4 hungadó femenino.
E partido final di B-klas Mary Ann Mac Leod a gana di Cai Walters ku skor di 3-0. Despues di un tremendo bataya den e promé sèt, Mac Leod ta pika dilanti 1-0 via dje parsial 14-12. E lucha tenás aki parse a suak su kontrinkante bastante, ya komo ku ela pèrdè e sigiuente dos sètnan sin masha bataya: 7-11 i 2-11.
Den kategoria dòbel Devon Meilink i Henny Metry a topa Dimitri Leon i Jaysron Mathilda. E number 2 i 3 di rènking tabata forma un duo ku ultimamente kasi no a pèrdè, pero e biaha aki a topa nan pareu den Leon i Mathilda, ku a gana ku skor di 3-1. E parsialnan tabata: 6-11, 11-6, 11-4 I 11-8.
A sigi despues e wega final den kategoria Master ku a bai entre Raymond Begina i Hensley Wentwoord. E dos old timers aki ya pa algun tempu ta bai tur final di Master, kaminda semper Begina ta sali di porta grandi. Wentwoord ta duna bon partido pero semper ta keda kòrtiku. Mesun kos a sosede atrobe kaminda yegando 9 semper Wentwoord tin e wega empata òf ta dilanti, pero di un manera of otro Begina ta uza su eksperensha i taktika pa gana. Aunke ku ela pèrdè, Wentwoord a pone Begina soda na òrdu bayendo punto èkstra: 12-10, 12-10 i 13-11.
E plato prinsipal dje kampionato tabata e wega final den kategoria Senior ku Dimitri Leon bayendo pa su di shete titulo máksimo di Kòrsou. Su kontrinkante Devon Meilink tabata kampeon na 2015 i den hopi evento e aña aki tabata den final kontra dje, asta ganando algun wega.
Pues e ekspektativa tabata haltu. E prome wega a bai pareu i pèrta, kaminda Leon ta pika dilanti 1-0 ganando e sèt ku skor di 12-10. Meilink a bòns bèk empatando e wega na 1 ganando e sèt ku skor di 11-8. Pero despues Leon a saka tur su armanan i pone nan den wega kitando tur initiativa for di Meilink. Ku e skornan di 11-9 i finalmente 11-4 e ta gana e titulo di Kòrsou un biaha mas. Skor final 4-1.
Despues dje wega ei den kategoria Senior, mesora a sigi ku entrega di premio, kaminda Dimitri Leon a bai ku 3 premio grandi. Banda di e premio komo kampeon di Kòrsou e la gana tambe e distinshon di Hungado mas Valioso di 2019. E di 3 titulo naturalmente ta e medaya di oro den dòbel. Sin duda e mihó hungadó di pinpòn aktualemnte na Kòrsou.
Asina tambe FTMK a klousurá e aña aki ku tur su torneonan i lo tin su tradishonal torneo di Pasku dia 8 di dezèmber, kaminda e federashon ta yama danki i tene un momentu plasentero ku su miembronan i sera asina ofishalmente aña 2019.
