E gran final den ‘Senior’ dje kampionato di tènis di mesa di Kòrsou ta bai entre Michael Dalnoot i Dimitri Leon. Tur dos hungadó a klasifiká invikto.
Anteriormente Federashon Tènis di Mesa Kòrsou (FTMK) a organisá e kampionato pa ekipo den kategoria A i grupo Master.
Den kategoria A e tim Social Media & More a titulá kampion di Kòrsou i asina pues prolongá su dominio. Den final e ekipo aki a gana ku skor di 3-1 di Donic. Den grupo Masters tabata Barberia Cinto ku a retené e titulo kampionil, derotando MF Medical den final ku skor di 3-0.
Despues dje kompetensia pa ekipo, a kuminsá e siman aki ku e weganan individual.
Den kategoria ‘Senior’ tabatin bataya duru pero deportivo entre e diferente hungadónan. Michael Dalnoot ku ta e aktual kampion di Kòrsou a demonstrá ku su wega ku e ta faborito e aña aki tambe.
Den bueltanan preliminar Dalnoot a gana di Jacinto Zimmerman (3-0: 11-9, 11-7 i 11-5), Raymond Begina (3-0: 11-8, 11-7 i 11-4). Den kwart final e kampion di Kòrsou a derotá Sigmar Carmelia tambe den 3 sèt strit (3-0): 11-9, 11-8 i 11-8.
E úniko hungadó ku a logra kita un sèt for di Dalnoot, tabata Henny Metry. Esaki a sosode den semi final. Despues di a pèrdè e promé sèt ku 7-11, Dalnoot ta batayá fuerte pa empatá e skor ganando di 2 sèt ku 12-10 pa despues sigui ku 11-9 i 11-4 i asina pasa pa final.
Dimitri Leon di su banda tambe a hunga tremendo. Ela gana konsekutivamente den preliminar di Asish Amrish (3-0: 11-4, 11-1 i 11-6), Lucien Alberg (3-0: 11-0, 11-0 i 11-0) i di Sigmar Carmelia (3-1: 11-6, 11-5 i 4-11 i 12-10).
Den kwartfinal Leon a gana ku 3-0 di Raymond Begina. E sètnan tabata 11-4, 11-5 i 11-6. Den semi final e talentoso hungadó a superá Devon Meilink ku 3-1 pa asina e pasa pa final: 8-11, 11-9, 13-11 i 11-7.
Den grupo Masters e gran final ta bai entre Ronaldi Vos i Hensley Wentwoord.
Vos a superá den preliminar Giovanny Silonero (3-0: 11-5, 11-6 i 11-9), Raymond Cathalina (3-0: 11-7, 13-11 i 11-6) i Jacinto Zimmerman (3-1: 11-3, 11-5, 9-11 i 11-7). Den kwart final e tabata superior na Lucien Alberg ku 3-0: 11-4, 11-9 i 11-6. Den semi final ela haña un wesu hopi duru den Raymond Begina. E wega aki a bai 5 sèt: 3-2 pa Vos ku skornan di 9-11, 11-7, 11-9, 6-11 i 11-8.
Wentwoord a gana den bueltanan preliminar di Glenn Aniceta (3-0: 11-0, 11-0 i 11-0) i Eric Adamus (3-0: 11-4, 11-5 i 12-10). Den kwart final ela superá Erwin Sophia tambe den 3 sèt: 11-2, 11-3 i 11-9. Peter Wong den semi final a spanta hopi hende ora ela gana e promé sèt for di Wentwoord (11-8), pero e hungadó aki a rekuperá lihé i gana e sigiuente sètnan: 12-10, 11-0 i 11-9.
