Sport.cw

Sponsored by

Sponsored by

Sponsored by

Sta Maria ta empatá seri

Sta Maria Pirates, djaweps 23 di novèmber 2017, a logra empatá e seri final den klase superior di beisbòl. E tim a gana ku skor di 7-5 dje aktual kampion Wild Cats. E wega a bai 11 entrada.

Federashon Beisbòl di Kòrsou (Febeko) a logra haña tur partido riba mesun liña i ayera djaweps finalmente a kontinuá ku e seri final. Esaki despues ku e final a keda interumpí na dos okashon anterior. E enkuentro a tuma lugá den Tio Daou Ballpark na Zapateer.

E Piratanan a bai dilanti den kabes di promé ining (2-0), pero e Pushinan Brabu a empatá den bòm di mesun entrada (2-2) pa despues tuma ventaha di 2 kareda: 4-2 den di 3 ining.

Sta Maria den su di 5 turno na bate a skor 3 kareda pa bolbe bai dilanti (5-4), pero un entrada despues Wild Cats ta empatá e wega: 5-5. Te den di kabes di 11 entrada e Piratanan ta logra skor 2 kareda i bolbe bai dilanti: 7-5. Komo ku e Pushinan Brabu no a skor den bòm di 11, e enkuentro a kaba na fabor dje Piratanan.

E sifranan final pa Sta Maria Pirates: 7 kareda, 11 hit i 3 eror. Wild Cats tabatin: 5 kareda, 5 hit i 3 eror. Picher ganadó a resultá Daantji, miéntras ku e mihó bateadó pa Sta Maria tabata Antersijn ku 3 hit den 5 turno i Snijders a dal un homerun. Picher Jakob a pèrdè e enkuentro pa Wild Cats, miéntras ku a sobresalí na bate Cleofa ku 2 hit den 4 turno, entre kua 1 homerun.

Enkuentro number 7, esta e wega final desisivo, ta tuma lugá awe anochi den Tio Daou Ballpark na Zapateer.

 

Translate »