Fundashon Desaroyo Deportivo Kòrsou (FDDK) tin un proyekto nobo di deporte. Na ougùstùs aki un grupo di 22 alumno di enseñansa di fundeshi lo kuminsá haña guia èkstra den deporte i rekreo. Esaki komo medio pa kombatí kriminalidat di un forma preventivo.
FDDK a risibí un suma total di 1.1 mion florin for di Ministerio di Hustisia, pa ta mas eksakto for di e Fondo pa Kriminalidat pa e proyekto spesífiko aki. Preparashon i ehekushon dje proyekto aki ta na enkargo dje fundashon mes.
E proyekto ta enserá ku 12 skol di enseñansa di fundeshi, ku no ta hañando moveshon físiko, lo kuminsá haña deporte i rekreashon mainta. Di tur e alumnonan, lo skohe un kantidat ku lo forma parti di e proyekto ku ta enserá ku e muchanan aki lo bai keda skol den oranan di mèrdia i risibí guia den un ramo di deporte.
Banda di risibí e preparashon pa desaroyá nan talento, lo dediká atenshon spesial pa e muchanan aki siña disiplina, desaroyá otro kualidatnan importante den nan formashon.
Na aña 2015 FDDK a entregá e petishon di e proyekto aki na minister di Hustisia di tempu ei, Nelson Navarro. Esaki a ser aprobá pa un aña, ku posibilidat pa keda alargá pa dos aña mas.
E suma ku a risibí aworaki ta kubri un aña. FDDK ta perkurá pa un guia òf instruktor i un asistente na kada skol. Esakinan lo sòru pa e muchanan haña unifòrm i dos bes pa siman un almuerso bon balansá i naturalmente guia den deporte. Den e organisashon ta apuntá un kordinadó pa henter e proyekto, loke ku tin un vakatura p’e na e momentunan aki.
E proyekto aki ta similar na e proyekto “Alleen Jij Bepaalt Wie Je Bent” ku tin aktualmente den ehekushon na VSBO St. Jozef i tambe AGO Montaña. Ta un proyekto ku ta dirigí riba hobennan di 12 pa 18 aña ku ta bishita skol sekundario.
E proyekto nobo di FDDK ta dirigí riba hobennan di skolnan di fundeshi bou di e nomber “Ami i mi Futuro”, komo ku ta hustamente na e etapa aki e problemanan ta kuminsá serka nos hobennan.
Teksto pa foto:
Naisha St. Jago ta e persona kende a skibi e proyekto ”Ami I mi Futuro” .
Foto: FDDK