Devon Melink awe nochi ta mira akshon den dos final dje kampionato di Federashon Tènis di Mesa Kòrsou (FTMK). Despues di a klasifiká anteriormente pa final individual den divishon máksimo, ayera -djaweps 6 di dezèmber 2018- ela pasa pa final di wega dòbel tambe.
Un total di 10 pareha a inskribí pa kompeté den e seri di weganan dòbel, di kua 9 a presentá. E hungadónan aki a hunga den dos pul. E kompetensia aki tambe a tuma lugá den sala rekreo Irene Moreno na Muizenberg.
Despues dje beultanan preliminar e sigiuente kuater parehanan a klasifiká pa semi final: Devon Melink/Henny Metry, Ravi Rajwani/Jaysron Mathilda, Peter Wong/Hensley Wentwoord i Jacinto Zimmerman/Lucien Alberg.
Melink i Metry a gana ku relativo fasilidat di Wong i Wentwoord: 3-0. E parsialnan ta 11-5, 11-2 i 11-7. Ku e viktoria aki e ganadónan a sigurá nan pase pa e gran final.
E otro semi final a bai sinku sèt. Zimmerman i Alberg a sali gana e promé sèt ku skor di 11-5. Rajwani i Mathilda a empatá e skor ganando e di dos sèt ku skor di 11-8 pa despues tuma ventaha di 2-1 ku triunfo di 12-10 den e di tres sèt. Zimmerman i Alberg sinembargo a bini bèk ku viktoria di 11-6 den di kuater pa empatá e wega na 2-2 i forsa e di sinku sèt. Tabata Rajwani i Mathilda ku tabatin mihó wega i via di 11-8 a gana e seri 3-2.
E resultadonan ta enserá ku Melink/Metry i Rajwani/Mathilda ta topa otro awenochi, djabièrnè 7 di dezèmber, den final. Esaki ta planiá pa kuminsá kuartu pa 9. Promé ku e wega aki ta kuminsá 8’or e final di klas B entre Mary-Ann Mac Leod i Dik Hendriks. Mitar di 10 tin programá e final den Masters entre Raymond Begina i Hensley Wentwoord. Finalmente pa kuartu pasá di 10 tin e final den divishon máksimo entre Devon Melink i Dimitri Leon.
