Treasure New Era a kuminsá e di dos edishon dje Torneo Candia ‘Shishi’ Paulo-Felipa ku un viktoria grandi riba Warriors: 18-0. Shinning Stars a superá Mas Goso ku skor di 11-4.
Torneo Candia ‘Shishi’ Paulo-Felipa a kuminsá ayera, djaweps 6 di dezèmber, i ta dura te djadumingu 9. E kompetensia ta tuma lugá den Post 6 Ballpark na Rio Canario.
E torneo ta konsistí di dos kategoria: divishon 35+ i U21 Fast pitch. Den klas 35+ tin seis tim: Mas Goso, Treasure New Era, Sin Stress, Shinning Stars, Warriors i Rising Trotters. Den divishon U21 Fast pitch ta kompetí tres tim: Sta Rosa Angels, Souax Softball Team i Dream Girls.
E kompetensia a ranka sali ayera ku dos wega den divishon 35+. Tabatin un total di 33 kareda. Shinning Stars a gana ku skor di 11-4 di Mas Goso, miéntras ku Treasure New Era a bati Warriors ku skor abultá di 18-0.
E torneo ta sigui awenochi ku atrobe dos wega. Mitar di 8 tin e wega entre Sin Stress i Mas Goso. Pa 9’or tin apertura ofisial i mitar di 10 tin e enkuentro den U21 Fast pitch entre Sta Rosa Angels i Souax Softball Team.
