Wild Cats Guardian Group/KJ74 djaweps, 20 di yüni 2019, a gana su di 13 wega den kampionato di beisbòl dòbel A, esta Liga Aqualectra. E supkampion di Kòrsou a derotá Royal Scorpions Mr Baseball CPS/AGT ku skor konvinsente di 7-3.
Federashon Beisbòl Kòrsou (Febeko) a sigui djaweps ku su kampionato den divishon máksimo den Tio Daou Ballpark na Noord Zapateer.
Royal Scorpions den bòm di promé inen a pika dilanti: 1-0. Wild Cats a skor 1 kareda den su di dos turno na bate, pero e Skòrpiunnan a bolbe skor 2 kareda pa asina tuma ventaha di 3-1 i tabata mustra riba bon kaminda pa bolbe gana dje Pushinan Brabu.
Despues ku Wild Cats a skor 1 kareda den di kuater inen pa aserká Royal Scorpions te na 2-3, e tim supkampion di Kòrsou a eksplotá den su di 8 turno ku 3 kareda pa asina bòltu e skor pa promé biaha na su fabor: 5-3. Den último inen e Pushinan Brabu a anotá 2 kareda mas i fihá e skor final na 7-3.
Picher Swenton Martina a gana e wega pa Wild Cats. Durante 7 inen di trabou ela pèrmití 3 kareda riba 3 hit, miéntras ku ela ponchá 5 batiadó i duna 2 ‘base por bola’. Den di 8 inen ela haña relevo di picher Richard Moesker ku den 2 inen no a pèrmiti hit ni kareda na Royal Scorpions.
Yurendell de Caster i Jurickson Fecunda a sobresalí na bate pa Wild Cats. Kada un a bati 2 hit den 4 turno. E Pushinan Brabu a kaba ku 7 kareda, 8 hit i 2 eror. Esaki tabata e di 13 triunfo pa Wild Cats e aña’ki. E tim a pèrdè 3 wega só te ainda i ta sólido na e promé lugá.
Picher Cerilio Soleano a sufri e derota pa Royal Scorpions. Ela drenta di relevo den di 5 inen na lugá di Rahino Doran ku na su turno a relevá picher habridó Brian Biegel. Picher Gavanee Virginia tambe a mira akshon pa e Skòrpiunnan.
E mihó batiadó pa Royal Scorpions tabata Raywendley van Gurp. Ela dal 1 hit den 3 turno. Curtney Doran a bati un homerun pa e Skòrpiunnan. Royal Scorpions tabatin 3 kareda, 3 hit i 2 eror. E tim ta okupá e di tres lugá ku 8 viktoria i 6 derota.
E kampionato di Febeko ta sigui awe, djasabra, ku e wega entre Fire Birds i Royal Scorpions. Esaki ta kuminsá mitar di 8 di anochi den Stadion Johnny Vrutaal, Rif, Otrobanda.