Kòrsou awe’tardi, djasabra 5 di ougùstùs, a konkistá su di tres titulo mundial den Senior League. Liga Pabou den representashon di Karibe a nòkout New Jersey den e ultimo wega dje World Series den e ligá ku skor di 14 pa 1. E tim for dje kampionato di Karibe te na Easley no a pèrdè niun wega.
Atrobe Kòrsou a hunga un tremendo wega ku un tremendo bateo, picheo i fildeo. E tim a skor 14 kareda riba 14 hit i no a faya den defensa riba tereno. Porsierto ku den tur e triunfonan e hóbennan lokal a skor 10 òf mas kareda na Easley.
Kòrsou a kuminsá e wega agresivo hinkando 7 kareda den promé inen. E tim a ampliá esaki ku 1 kareda mas den su di dos turno. New Jersey a skor su úniko kareda den bòm dje di dos inen: 8 pa 1. Den di tres inen Kòrsou a skor 2 kareda mas pa hasi e wega 10 pa 1.
Den di kuater inen Kòrsou no a skor, pero wèl den di sinku. Kuater hungadó lokal a krusa plato pa hasi e skor 14 pa 1. Komo ku New Jersey no a skor den bòm dje inen ei, e regla di nòkout a bira vigente ku Kòrsou ganando e wega pa titulá kampion di Senior League World Series 2023
Turesten ku su koleganan di tim tabata bati hit pariba pabou na Easley, picher Kevin Rosina tabata tirando strike kontra batiadónan di New Jersey. Ela pèrmití solamente 1 kareda riba 2 hit pa asina guiá Kòrsou na e titulo kampionil.
Esaki ta e di tres titulo mundial ku Kòrsou ta gana den historia di Senior League World Series. E promé tabata na aña 2002 hungando bou di bandera antiano lagando Florida komo supkampion. Despues a sigui konkista dje titulo kampionil na 2018 ku Delaware kedando komo supkampion. Awe ta New Jersey a haña sota kedando na di dos puesto.
Na ocho okashon Kòrsou a hunga den final di Senior League World Series. Sinku biaha e timnan lokal a sali supkampion> Esaki tabata na 1983 (Taiwan kampion), 1985 (Taiwan kampion), 2008 (New Jersey kampion), 2014 (Houston kampion) i na 2019 (Hawaii kampion).
