Watakeli a gana su di dos wega den e kampionato nobo di vòlibòl den klase maskulino superior. E biaha e kampion di Kòrsou a superá Green Tigers. Den klase femenino superior e tim di Stakamahakchi tambe a logra su di dos viktoria den dos salida a kosto di Green Jewels.

Federashon Vòlibòl di Kòrsou (Fevoko) a sigui ayera, djadumingu 11 di novèmber 2018, ku e kompetensia lokal den sala di deporte Errol Rooi di Sentro Deportivo Kòrsou (SDK) na Brievengat. Tabatin kuater wega riba programa.

Despues ku Watakeli a triunfá wikènt pasá den e wega inougural riba Titus (3-0), ayera djadumingu ela deortá Green Tigers ku mesun skor di 3-0. E parsialnan tabata 25-19, 25-16 i 25-22. Prinsipalmente den di tres sèt e Tigernan Bèrdè a duna mihó bataya, pero a keda tòg kòrtiku.

Den e otro enkuentro den klase maskulino superior e tim di Stakamahakchi a gana su promé wega ku e ta hunga den e kampionato nobo. E tim a presentá ku un ekipo hóben riba kancha i a superá Titus ku skor di 3-0. Aunke e skor aki no ta ilustrá esei, pero e tim ku a promové e aña aki a bende su kueru karu den kada sèt alkansando kada bia mas ku 20 punto. E parsialnan ta: 25-23, 27-25 i 25-21.

Den klase femenino superior Stakamahakchi ku a gana anteriormente di Watakeli (3-0; 25-14, 25-20 i 25-19), den su di dos enkuentro a superá Green Jewels tambe ku skor di 3-0. E parsialnan ta: 25-6, 25-15 i 25-23. Den di tres sèt Green Jewels kasi a sorprendé, pero tambe a keda kòrtiku.

Den e otro enkuentro den klase femenino superior Shuatanari den un wega emoshonante a gana ku skor di 3-1 di Watakeli. Shuatanari a bai dilanti 2-0 ganando e promé dos sètnan ku 25-21 i 25-23. Watakeli ta kòrta e ventaha ora ela gana di tres ku skor di 25-14. Shuatanari a rekuperá despues i seya e triunfo ganando e di kuater sèt ku 25-23.

Promé ayera djadumingu tabatin den siman tras di lomba tambe enkuentronan den divishon A tantu femenino komo maskulino. Esakinan a tuma lugá den mesun sala di deporte Errol Rooi di SDK.

Den femenino klase A Stakamahakchi a gana di Watakeli ku skor di 2-0: 25-19 i 25-11. Den maskulino A Staka a superá Green Tigers 2-0: 25-19 i 25-21 i Titus a derotá Xaverianen 2-0: 25-16 i 27-25.

E kampionato di vòlibòl ta sigui awenochi ku weganan den klase A. Den divishon femenino tin e enkuentro entre Watakeli i Hurricane. Den klase maskulino tin 3 wega riba programa: Watakeli vs Titus, Warwaru vs Green Tigers i Xaverianen vs Stakamahakchi. E promé weganan ta kuminsá 8’or.