Sta Rosa Indians a gana su di tres enkuentro den kampionato nobo di beisbòl dòbel A, esta Liga Aqualectra. E tim a derotá Groot Kwartier Stars awe, djadumingu 6 di mei 2018, ku skor di 12-5. Mas aleu Marchena Braves a gana di Fire Birds OMB: 8-5.
E kompetensia di beisbòl den Liga Aqualectra ta keda organisá pa Federashon Beisbòl di Kòrsou (Febeko). Tabatin 3 enkuentro den wikènt tras di lomba.
Riba djasabra den Stadion Johnny Vrutaal riba Rif den Otrobanda, Royal Scorpions ta logra su promé viktoria despues di dos derota. E tim a gana ku skor pèrtá di 10-9 di Sta Maria Pirates Chippie, despues ku e tabata pèrdí ku skor di 8-0.
Tabata mustra den promé instante ku e Piratanan tabata bai gana e wega fasil, ora ku nan a tuma ventaha di 8-0 den apenas tres inen. E Skòrpiunnan den nan di seis turno na bate a skor 4 kareda pa despues anotá den e sigiuente 3 inennan total 6 kareda mas pa gana finalmente ku 10-9.
Meskos ku Royal Scorpions, Marchena Braves tambe a bini dja’tras awe djadumingu den Parke Heintje Kool pa gana di Fire Birds OMB: 8-5. Te ku e di kuater inen e wega tabata empatá na 2 kareda. Den bòm di sinku entrada Fire Birds a skor 3 kareda i bai 5-3 dilanti. Marchena ku 1 kareda den di seis i 4 kareda den kabes di nuebe inen, ta bòltu e skor na su fabor.
Den e di dos enkuentro awe djadumingu den Parke Heintje Koot Sta Rosa Indians tambe a sali brabu i despues di apenas dos inen tabatin ventaha di 8 kareda riba Groot Kwartier Stars: 9-1. Den nan di sinku turno na bate e Indjannan a hinka 3 kareda mas: 12-2. Groot Kwartier a purba bin bèk den wega anotando 3 kareda den di 7 inen, pero esei tabata tur kos: 5-12.
Despues di 9 wega Sta Rosa Indians ta invikto na kabes ku 3 triunfo sin derota. Wild Cats Guardian Group/KJ74 tambe ta invikto pero ku 2 viktoria. Despues ta sigui Marchena Braves, Royal Scorpions, Sta Maria Pirates i Groot Kwartier Stars tur ku 1 wega ganá i 2 pèrdí. Fire Birds ta den sotano ku 2 derota.
E kompetensia den Liga Aqualectra ta kontinuá djamars awó ku e wega entre Wild Cats i Fire Birds. Esaki ta tuma lugá den Tio Daou Ballpark i ta kuminsá mitar di 8 di anochi.
