E kampionato di sòfbòl fastpitch femenino, esta dòbel A, a ranka sali den wikènt tras di lomba. Un total di 3 enkuentro a keda hungá den Sabana Ballpark.
E kampionato 2018 ta dediká na e Pichingolo Nissan. E organisashon aki ta kumpliendo 45 aña aktivo den sòfbòl ‘fast pitch’. Apertura dje kompetensia a tuma lugá djabièrnè anochi.
Komo maestro di seremonia durante apertura dje kampionato 2018 a fungí Richard ‘Chati’ Constancia. Despues dje interpretashon di himno di Kòrsou i diskursonan korespondiente di presidente di Curaçaose Softball Bond (CSB) i representante di Federashon Deportivo I Olímpiko Kòrsou (FDOK), tabatin e wega di apertura.
E wega inougural tabata entre kampion aktual Sta Rosa Angels Vanddis i supkampion Pichingolo Nissan. E Angelnan di Sta Rosa a gana ku skor di 5-2. Picher ganadó a resultá Leonella Elizabeth, miéntras ku su kolega di tim Charité Nepomuceno a dal 1 hit den 2 turno na bate.
Picher Lee-Ann Craanberg a karga ku e derota pa Pichingolo. Su koleganan di ekipo Genevieve Hariquez i Emely Jonis a destaká na bate, kada un ku 2 hit den 3 turno.
Riba djasabra tabatin dos wega den Sabana Ballpark. Den e promé enkuentro ku a kuminsá mitar di 8 anochi, Eagles Softex i Demolition Cartel NV a hunga kontra di otro.
Eagles Softex a gana e enkuentro ku skor di 8-3. Shurdenay Obispo tabata e picher ganadó. Liliana Martina a bati 1 hit den 2 turno pa e tim ganadó. Picher Arlynalda Margarita a resultá e pèrdèdó, miéntras ku su kolega di ekipo Surdienne Griejaloe a sobresalí na bate ku 2 hit den 3 turno.
Den e di dos wega riba djasabra Nos Teu Curaçao Office Supply a superá The Fighting Team ku skor ku di 3-2. Picher Tafari Janga a tira un ‘1 hitter’ i sigurá e viktoria. E mes tambe a sali mihó bateadó ku 2 hit den 3 turno. Picher Ruthsainy Calmera a sufri e derota, miéntras ku Tanusi Delando tabatin 1 hit den 3 turno na bate.
E kampionato nobo di sòfbòl dòbel A femenino ta kontinuá djarason awor ku atrobe dos enkuentro den Sabana Ballpark. Demolition Cartel NV i The Fighting Team ta subi tereno pa mitar di 8 di anochi kontra di otro, miéntras ku mitar di 10 tin e wega entre Eagles Softex i Sta Rosa Angels Vanddis.
