Liga Pariba ayera, djaluna 30 di aprel 2018, a konkistá e titulo den e seri di weganan den Junior division. Esaki ta nifiká ku e selekshon aki ta representá Kòrsou den e kampionato regional ku ta tuma lugá próksimamente na Aruba.
E organisashon Curaço Little League den e dianan tras di lomba a organisá diferente seri di wega den su divishonnan, tambe den Junior division. Den e divishon aki a enfrentá otro Liga Pariba i Liga Pabou.
Riba djabièrnè 27 di aprel Liga Pariba a sali gana ku skor di 4-1, miéntras ku djasabra mesun selekshon a bolbe triunfá ku skor di 8-2 i asina tuma ventaha di 2 viktoria den e seri. Riba djadumingu Liga Pabou ta gana ku skor di 7-4 i asina hasi e seri 1-2.
E enkuentro di ayera, djaluna, a kaba den un viktoria grandi pa Liga Pariba: 15-5. E picher ganadó tabata Michael Angel Vilchez. Lyendley van ’t Kruys a dal 1 hit den 1 turno pa e selekshon ganadó. Picher Cleavon Lasten a sufri e derota, miéntras ku Jediael Maduro tabata bon pa 3 hit den 4 turno na bate.
Ku e viktoria aki Liga Pariba a gana e derechi pa representá Kòrsou den e próksimo kampionato regional. Esaki ta tuma lugá di 6 pa 15 yüli na Aruba.
