Liga Pabou a gana ayera, djaluna 30 di aprel 2018, e seri den Little division i lo representá Korsou den e próksimo kampionato regional. E selekshon aki a gana di Liga Pabou den e wega desisivo ku skor di 13-12.
Manera ta kustumber e organisashon Curaçao Little League a organisá un seri di enkuentro den Little division. Esaki a bai entre Liga Pariba, Liga Willemstad i Liga Pabou. E tim ku gana ta representá Kòrsou den e kampionato di Karibe.
Liga Pabou a gana e seri di weganan ku a keda hungá último dianan. Riba djaweps 26 di aprel Liga Pabou a gana ku skor pèrtá di 7-6 di Liga Pariba pa asina tuma ventaha di 1-0.
Un dia despues, esta djabièrnè 27 di aprel, Liga Pabou a gana su di dos wega ora ela derotá Liga Willemstad ku skor di 12-2. Esaki, miéntras ku Liga Pariba riba djasabra tambe a gana di Liga Willemstad: 15-1. Djadumingu 29 di aprel Pabou i Pariba a bolbe topa otro i e selekshon di Pariba a gana e biaha’ki ku skor di 4-3.
Den un enkuentro di deskite ayera djaluna, Liga Pabou a gana ku skor di 13-12 di Liga Pariba. Picher ganadó a resultá Jamdrick Cornelia, miéntras ku Shendrion Martinus a bati 2 hit den 2 turno na bate. Picher pèrdèdó tabata Charlie Zink i Gensley Ryan a dal 1 hit den 1 turno.
Ku e viktoria den e wega desisivo aki, Liga Pabou a gana e derechi pa representá Kòrsou den e kampionato di Karibe den Little division. Esaki ta tuma lugá na Puerto Rico entre 13 pa 17 yüli próksimo
