Dimitri Leon a prolongá su titulo kampionil den divishon máksimo di Federashon Tènis di Mesa Kòrsou (FTMK). Ela gana den final ku skor di 4-2 di Devon Melink. Den kategoria Masters Raymond Begina a sali kampion, Dik Hendriks a gana e titulo den klas B i den kategoria dòbel Melink i Henny Metry a triunfá.
Direktiva di FTMK atrobe por mira’tras riba un eksitoso kampionato di Kòrsou den e diferente kategorianan. E kulminashon tabata ayera, djabièrnè 7 di dezèmber 2018. Tur wega a tuma lugá den sala rekreo Irene Moreno na Muizenberg.
Leon ku aña pasá a kita e titulo di Michael Dalnoot, e aña’ki tabatin Melink komo kontrinkante den final dje divishon superior di FTMK. Dalnoot no a kompeti e biaha’ki.
E wega a kuminsá ku Leon ganando e promé dos sètnan ku skor di 11-9 i asina bai 2-0 dilanti. Melink sinembargo no a deskurashá i a logra bin bèk den e seri ganando na su turno e sigiuente dos sètnan pa empatá e skor na 2: 12-10 i 11-9.
Leon despues ku e wega a empatá 2-2 a rekuperá i gana e di sinku sèt ku skor di 11-5 i asina bai dilanti 3-2. Finalmente ela gana tambe e di seis sèt ku skor di 11-6 pa gana e seri 4-2 i asina kleim e titulo kampionil, loke a nifiká pues ku ela bolbe sali kampion di Kòrsou.
Wentwoord ku aña pasá a konkistá e titulo kontra Ronaldi Vos den Masters, e biaha’ki tabatin Begina komo kontrinkante. E wega final aki a bai sinku sèt ku e hungadónan bringando duru pa kada punto. Begina a bai dilanti 2-0 ganando e promé setnan ku 13-11 i 14-12 i tabata falta un sèt pa kita e tirulo for di Wentwoord.
Sinembargo Wentwoord tabatin otro pensamentu i a bin fuerte den e siguente dos sèt pa empatá e seri 2-2: 11-7 – 11-5. Esaki a nifiká ku mester a hunga e di sinku sèt i tabata Begina ku a rekuperá i a derotá Wentwoord ku skor di 11-4 i asina tòg kleim e titulo.
Den divishon B Mac Leod a kuminsá e final riba bon pia ganando e promé sèt ku skor di 11-7. Hendriks despues di esei a rekuperá i no a pèrmití nada mas na su kontrinkante femenina i a gana tres sèt sigui pa bira kampion: 11-5, 11-9 i 11-7.
Den wega dòbel Melink i Metry tabata desidido den nan enkuentro kontra di Ravi Rajwani i Jasron Mathilda. Nan a gana e final den tres sèt ku skor identiko: 11-5, 11-5 i 11-5.
