Un total di atrobe 33 kareda tabatin riba e di dos dia dje Torneo Candia ‘Shishi’ Paulo-Felipa ku a kuminsá djaweps. Souax Softball Team a gana ayera, djabièrnè 7 di dezèmber 2018, ku skor di 14-7 di Sta Rosa Angels, miéntras ku Sin Stress a superá Mas Goso ku skor di 9-3.
E torneo Candia ‘Shishi’ Paulo-Felipa ta tèrminá mañan djadumingu. E kompetensia di sòfbòl aki ta tuma lugá den Post 6 Ballpark.
E torneo ta konsistí di dos kategoria: divishon 35+ i U21 Fast pitch. Den klas 35+ tin seis tim: Mas Goso, Treasure New Era, Sin Stress, Shinning Stars, Warriors i Rising Trotters. Den divishon U21 Fast pitch ta kompetí tres tim: Sta Rosa Angels, Souax Softball Team i Dream Girls.
Despues ku Treasure New Era a gana ku 18-0 di Warriors i Shinning Stars a derotá Mas Goso 11-4 riba e promé dia, riba e di dos dia tambe tabatin fiesta di kareda: 33.
Den divishon 35+ Mas Goso a sufri su di dos derota ayera. E biaha’ki Sin Stress a gana dje tim ku skor di 9-3. Picher Marin Winster a gana e wega, miéntras ku Juglin Winklaar i Janitza Betrian a sobresalí na bate kada un ku 2 hit den 3 turno.
Den divishon U21 Fast pitch Souax Softball Team a superá Sta Rosa Angels ku skor di 14-7. Picher ganadó tabata Kiara Domacasse, miéntras ku Ivanienlla Belfor, Ashantty Alexdander, Tizony Raap i Dianthe Gibbes tur a dal 1 hit den 1 turno.
