SBAB a konkistá dos titulo kampionil den e éksitoso torneo di sòfbòl Aqualectra Hope. E tim aki a gana den kategorianan Coed i Challenger. MCB a titulá kampion den kategoria Sosial Femenino. Den Sosial Maskulino Omni a sali kampion, miéntras ku Damen a gana den Sosial Maskulino Plus.
E torneo Aqualectra Hope a yega na un fin ku bon weganan den final. Un bon públiko a haña kaminda pa Suvek Ballparl na Van Engelen, kaminda e finalnan den diferente kategorianan a tuma lugá.
Den kategoria Coed SBAB a superá MCB ku skor di 14-4. Franklin Marchena di Mc Donald’s a sali kampion bate. Mihó picher tabata Fabian Daniel di MCB. Frensley Martina di Centrale Bank a dal mas homerun. Hungadó mas balioso a resultá Ryan Ilario di SBAB.
SBAB den kategoria Challenger tambe a konkistá e titulo kampionil ganando den final ku skor di 10-8 di FDDK. Yurendell de Caster di FDDK a sali kampion bate, miéntras ku Darwin Blanquisette di JP Maal a bati mas homerun. E premio di mihó picher a bai pa Hemsley Martha di SBAB, miéntras ku Farrel Steen di SBAB a sali hungadó mas balioso.
Omni a titulá kampion den kategoria Sosial Maskulino. E tim aki a gana den final di MCB: 11-5. Kampion bate a resultá Ericson Martina di EWT/Curaçao Food. Kampion honronero a resultá Shurbey Sambo di Building Depot. Fabian Daniel di MCB a gana e premio di mihó picher, miéntras ku Raynold Marchena di Omni a sali e hungadó mas balioso.
Den kategoria Sosial Femenino MCB a superá SBAB den final ku skor pèrtá di 2-1. Gianina Petrona di Kooyman a bai kas ku e premio di kampion bate, miéntras ku Yurina de Caster di SBAB a sali kampion honronero. Leonelle Bonifacio di Onderwijs a gana e premio di mihó picher, anto Soraya Bryan di MCB a sali hungadó mas balioso.
Finalmente den kategoria Sosial Maskulino Plus e tim kampion a resultá Damen ku a gana den final di SOAB ku skor di 6-1. Kampion bate a sali Ryan Cannegieter di SOAB, miéntras ku esun ku a bati mas homerun tabata Edson de Caster di The Trader. Gerinaldo Job di The Trader tabata kampion picher, miéntras ku Gercival Catlyn di Damen a resultá e hungadó mas balioso.
