Royal Scorpions Mr Baseball My Malls awe, djaweps 2 di mei 2019, a gana su di dos wega den e kampionato nobo den kategoria dòbel A di Federashon Beisbòl Kòrsou (Febeko). E tim a laga su eterno rival Wild Cats Guardian Group/KJ74 den tereno: 8-7.
E enkuentro entre e Pushinan Brabu i Skòrpiunnan ta tuma lugá den Tio Daou Ballpark na Sapaté. Esaki ta e di nuebe wega den e kampionato nobo ku ta patrosiná pa Aqualectra.
E promé klásiko pa e aña aki entre Wild Cats i Scorpions a kuminsá ku e Pushinan Brabu hinkando 3 kareda den nan promé turno. Den bòm di mesun inen Scorpions a kòrta e ventaha: 1-3. Tur dos tim a skor 1 kareda den tantu di tres komo kuater inen pa hasi e skor 5-3 na fabor di Wild Cats.
E Pushinan Brabu den nan di sinku turno na bate a skor 2 kareda mas pa hasi e wega 7-3 i hopi fanátiko a kere ku e tim supkampion tabata bai gana e wega fasil. Royal Scorpions sinembargho a kontestá ku 3 kareda den bòm di mesun inen i aserká su eterno rivalnan te na 1 kareda: 6-7. Ku 1 kareda den di seis i atrobe 1 kareda den di ocho inen, e Skòrpiunnan a laga e Pushinan Brabu den tereno: 8-7.
Tabatin 4 homerun den e wega; 2 pa banda. Pa Scorpions Imperator i Van Gurp a dal buelta rondó dje basenan, miéntras ku pa Wild Cats tabata Mujica i Kirindongo ku a dal un homerun. Porsierto ku Van Gurp tabatin un anochi perfekto na bate pa Royal Scorpions ku 2 hit den 2 turno, mesun kos ku Gustina ku a bai di 2-2. Pa Wild Cats e mihó bateadó tabata Kirindongo ku 2 hit den 4 turno i ku esakinan ela sòru pa hinka 3 kareda’den pa su tim.
Picher Soleana a gana e enkuentro pa Royal Scorpions. Ela drenta wega den di seis inen i no a pèrmití kareda ni hit na Wild Cats, apesar ku ela duna 2 ‘base por bola’ i di otro banda ponchá 2 bateadó. Tielman a kuminsá riba montíkulo pa e Skòrpiunnan i den 4 inen di trabou a pèrmití 5 kareda riba 5 hit, bou di kua e 2 homerunnan di Mujica i Kirindongo.
Pa Wild Cats Moesker a resultá e picher pèrdèdó. Ela drenta di relevo den di sinku inen i den 2,2 inen di trabou a haña 2 kareda riba 3 hit kontra. Picher habridó Jakob den 4,2 inen a pèrmití 6 kareda riba 7 hit, bou di kua e 2 homerunnan di Imperator i Van Gurp.
