Suffisant Eagles ta e kampion nobo di sòfbòl maskulino dòbel A. E tim a konkistá awe, djaluna 15 di oktober 2018, e titulo derotando Dream Team den di kuater wega dje seri final: 10-1. Esaki tras di lansamentunan di picher Selvinson Angelista.
Curaçaose Softball Bond (CSB) pa di tres aña konsekutivo a organisá e kampionato di sòfbòl maskulino, despues ku pa mas ku un dekada no tabatin wega den e divishon aki. Tur e enkuentronan a tuma lugá den Suffisant Ballpark.
Despues di tres buelta preliminar a sigui ku e seri prefinal i e final, ku tabata un ‘best of 5’ entre Suffisant Eagles i Dream Team. Despues di a pèrdè e promé enkuentro, Eagles a gana tres wega siguí pa titulá kampion i asina kita e korona for di Dream Team.
Suffisant Eagles a kuminsá e wega brabu ora ku e promé bateadó Jeandimar Ignacio a dal un homerun: 1-0. Den di dos inen e tim a skor 4 kareda i amplia e skor na 5-0. Despues di dos inen sin hinka kareda, Eagles a eksplotá den su di sinku turno: 10-0.
Turesten picher Selvinson Angelista no tabatin problema pa dominá e bateadónan di Dream Team, ku porsierto te ku aña pasá ela militá den e tim aki. Ela yega e último inen tirando un ‘one hitter’ i tabata falta 3 out pa logra un blankeo. Sinembargo Jurich Marlin a sorprendé ku un homerun i asina kibra e blankeo: 1-10.
Selvinson Angelista a gana e wega pa Suffisant Eagles. Aldair Daal a sobresalí na bate ku 2 hit den 3 turno. Picher Pancho Selberie a sufri e derota pa Dream Team.
Suffisant Eagles: 10 kareda, 9 hit i 0 eror. Dream Team: 1 kareda, 2 hit i 1 eror.
