Sport.cw

Sponsored by

Sponsored by

Sponsored by

Eagles Softex a empatá seri

Eagles Softex ayera, djaweps 27 di sèptèmber 2018, a gana ku skor minimo (1-0) di Pichingolo Nissan. Ku e triunfo aki e tim a empatá e serie den semi final di divishon máksimo di Curaçao Softball Bond (CSB) i asina forsá un wega desisivo.

Ganadó dje seri entre Pichingolo i Eagles ta pasa pa final pa hunga kontra Sta Rosa Angels Vanddis. E aktual kampion di Kòrsou fo’i siman pasá a klasifiká i pues ta wardando riba su próksimo kontrinkante.

Un bon públiko tabata testigu di un tremendo wega den Frank Curiel Ballpark na Sta Maria. Tabata un enkuentro dominá pa bon picheo. E duelo riba montíkulo aki tabata entre Richella van Gennip i Arnalda Margaritha.

Despues ku Pichingolo a gana e promé enkuentro di semi final, ayera Eagles a presentá bon prepará pa e di dos wega. Prinsipalmente Van Gennip a sobresalí pa e tim ganadó. Na momentonan krusial, manera den di seis inen ku base yen, ela pèrta brasa i sali sin pèrmití kareda fo’i dje entrada. Mas aleu e picher a ponchá 13 bateadó.

Ryan Manuela a skor e úniko kareda dje enkuentro. Esaki a sosodé den di 2 inen. Tabata Loeyendra Valentyn ku a bati un hit pa ‘left field’ i asina empuhá e kareda’ki. E mihó bateadó pa Eagles a resultá Susmailine Rifaela ku a dal 2 hit den 3 turno: 3-2. Eagles Softex: 1 kareda, 4 hit i 0 eror.

Picher Margaritha a sufri e derota, apesar ku e tambe tabata bon riba montíkulo. Ela pèrmití 1 kareda riba 4 hit. Rigmayra Poulina a bati 1 hit den 1 turno na bate: 1-1. Pichingolo Nissan: 0 kareda, 4 hit i 3 eror.

E semi final ta sigui awe’nochi den Buena Vista Ballpark. E wega desisivo aki ta kuminsá 8’or. Despues, alrededor di 10’or, tin e enkuentro di un divishon mas abou entre Clase Aparte i Dream Girls.

Translate »