Sport.cw

Sponsored by

Sponsored by

Sponsored by

Eksitoso seshon anti-dopahe

Sasha Sutherland djamars i ayera djarason 13 di yüni a duna seshonnan importante di anti-dopahe na Kòrsou. E direktor di Regional Anti-Doping Organization (RADO) a hasi esaki riba invitashon di Ruthsel Martina ku ta representante di Kòrsou den e organisashon regional aki.

RADO su ofisina prinsipal ta na Barbados. E organisashon ta e taki regional di World Anti-Doping Organization (WADA). Kòrsou ta un dje 18 miembronan dje organisashon regional. Esaki por sierto tabatin su reunion anual di 9 pa 11 di yüni na Oranjestad, Aruba.

Ruthsel Martina durente e reunion anual di RADO na Aruba, a probechá invitá e direktor Sasha Sutherland pa e duna algun instrukshon na Kòrsou pa asina yuda fortifiká e organisashon lokal di anti-dopahe. Esaki a keda honrá pa su persona.

Djamars 12 di yüni Sutherland a duna e asina yamá ‘Doping Control Officers’ lokal un entrenamentu kon esakinan tin ku tuma muestra di entre otro orina serka atletanan. Tambe e direktor di RADO a reuní ku miembronan dje asosashon di dòkternan di kas riba nan responsabilidat pa nan wak kua remedi por duna un atleta ora e tin ku bai kompetí.

Ayera, djárason 13 di yüni, Sutherland a  duna un presentashon na atletanan ku tin ku bai representá Kòrsou próksimamente na Weganan Sentro-Amerikano i di Karibe, esta CAC 2018. Tambe tabata presente entrenadónan i dirigentenan deportivo.

Sutherland a spliká e struktura di WADA, RADO i e organisashon di anti-dopahe lokal ku yama C-NADO. Tambe bou di guia dje direktor di RADO e ‘DCO’-nan lokal a hasi tèst di sorpresa bou dje atletanan ku tabata presente e anochi ayera djarason.

Awe djaweps Sutherland a hasi un bishita serka minister di deporte Marilyn Alcalá -Wallé. Durante e bishita aki ela duna un splikashon amplio dje struktura i tambe dje tarea dje organisashon di anti-dopahe lokal C-NADO i dje ròl importante ku gobièrnu di Kòrsou tin den e totalidat. Minister di su banda a primintí ku su persona i su departamento lo duna nan ful koperashon pa yuda den formashon di C-NADO.

Mañan djabièrnè 15 yüni Sasha Sutherland ta sali via Miami pa Barbados.

 

Translate »