Un kantidat rèkòrt di 180 hóben a partisipá na dos ’tryout’ ku e organisashon Major League Baseball (MLB) Curaçao a organisá. Esaki tabata forma parti dje asina yamá ‘Elite Program’.

E dos seshonnan, esta ’tryout’ a tuma lugá ayera djamars i awe djarason 31 di yanüari den Tio Daou Ballpark na Zapateer. Ayera tabata pa hóbennan di 13 pa 15 aña i awe tabata pa esnan di 16 pa 18 aña.

Promé ku e aktividatnan aki tabatin siman pasá seshonnan di informashon pa tur entrenadó i skòutnan lokal tokante e proyekto piloto di ‘MLB Curaçao Elite Program’.

E dos representantenan di MLB, Joel Araujo i Jimmy Meayke a haña e rèspòns sumamente positivo i despues a kuminsá ku preparashon pa e tryout di e peloteronan ku a keda skohe pues pa partisipá na e ‘MLB Curaçao Elite Program’ aki.

E proseso tabata ku e pelotero ku kier a partisipá mester a registrá adelantá sino e no por a partisipá. Esnan ku tin e deseo pa forma parti di ‘MLB Curaçao Elite Program’ mester a manda un email indikando nan deseo pa forma parti di e programa i tryout.

E programa i tryout tabata pa e hóbennan di 13 pa 18 aña di edat. E ‘Elite Program’ a pone pa inisiá despues di karnaval pa un periodo di seis siman. Esnan skohe pa partisipá na e programa lo train tres biaha pa siman pa 3 ora largu na Tio Daou Ballpark. Hungadónan lo risibí instrukshon di eks peloteronan di Liga Grandi i tambe Liga Menor.

 

E proyekto aki ta posibel danki na MLB, Curaçao Baseball Development Foundation i CTB.