Miembronan a elegí Erick ‘Eky’ Oleana atrobe komo presidente di Sport Unie Brion Trappers (SUBT). Esaki a tuma luga durante un reunion general di miembronan dje organisashon di futbòl akí djabièrnè pasá.
Durante e reunion general ei Oleana a duna un resúmen di su periodo komo presidente i di su direktiva 2023/2024. Den e próksimo periodo 2024/2025, e ta asistí pa e miembronan di direktiva Jarrod Diels, Riglène Cristina, Iris Kenepa, Monique Curiel, Ana Louisa i Albertico Overman.
SUBT ta un dje klupnan di futbòl mas bieuw di Kòrsou ku un trayektoria impreshonante, kaminda e organisashon a gana diferente titulo di futbòl di Kòrsou i di Antia. E tim ta militá den divishon máksimo di Federashon Futbòl Kòrsou (FFK). Porsierto ku e organisashon di futbòl ta selebrá otro aña (2025) su di 100 aña di eksistensia i for di e aña aki riba 17 di sèptèmber ta kuminsá ku lansámentu dje proyekto di selebrashon.