Excellence ta sigui na kabes riba e tabla di posishon den torneo di futbòl femenino pa Kopa Kòrsou. Den e kontinuashon dje kompetensia akí e tim ayera djamars a empatá na 0 gol ku Hubentut Fortuna, i awor ta liderá ku 7 punto for di tres wega.
Excellence i Hubentut Fortuna a topa otro den stadion Rignaal Jean Francisca na Brievengat. Ku e resulktado akí tantu Excellence komo Hubentut Fortuna a mantené nan status di invikto den e torneo di futbòl.
Te ku awor Excellence a logra dos viktoria i un empate. Hubentut Fortuna di su banda a registrá dos empate i a gana un wega. Esaki ta bon pa 5 punto i e di dos lugá riba e tabla di posishon.
Den e otro wega di auera Inter Willemstad a logra su promé viktoria. E tim a gana di Union Deportivo Bándabou (Undeba) ku skor di 3 pa 2. Danki na e triunfo akí, e tim di Vredenberg ta keda na di tres lugá ku 4 punto, mientras ku e tim di Bándabou ta ainda sin punto na di kuater i último puesto.
E di dos buelta dje torneo femenino pa Kopa Kòrsou ta kuminsá e djasabra awor. Un bes mas lo hunga den Stadion Rignaal Jean Francisca. Pa 9or di anochi tin e wega entre Excellence i Inter Willemstad. Den e promé buelta Excellence a gana ku skor di 2 pa 1 di Inter Willemstad.