Jurrangelo Cijntje ta sigui sobresalí den beisbòl profeshonal. E picher yu di Kòrsou di 21 aña a gana su di kuater wega den wikènt tras di lomba. Den divishon High A di Minor League Baseball (MiLB) e ‘switch pitcher’ a guia su tim Everett AquaSox na un triunfo di 3 pa 2 riba Hillsboro Hops
Cijntje a logra dominá e batiadónan di Hillsboro pa kuater ineng sin ku nan a skor kareda. AquaSox tabata dilanti 3 pa 0 ora ku finalmente den e sinku ineng, ela pèrmití 2 kareda na e tim kontrali.
Den di seis ineng Cijntje a rekuperá i no a pèrmití mas kareda di Hillsboro. Den e shete ineng ela sali for di wega, pues a traha lugá riba montiíkulo pa otro picher.
Cijntje a ponchá 7 batiadó den su 6 inengnan di trabou. Porsierto ku dos baha ela ponchá Druw Jones, ku ta yu Andruw Jones. Di otro banda Druw Jones ku un roletaso den kuadro a empuhá den di sinku ineng un dje dos karedanan di Hillsboro.
Cijntje ku ta un switch pitcher, esta por pichá tantu ku man robes komo esun drechi, a pèrmití solamente 3 hit na Hillsboro. Sinembargo ela duna 5 batiadó ‘base por bolas’, dos ku su man robes i tres ku su man drechi.
Te ainda e maneho di Everett AquaSox a uza Cijntje komo picher habridó i tambe komo relevista. Den e promé luna dje temporada den MiLB, kada siman ela kuminsá komo picher habridó. Den e weganan aki ela pichá ku su man drechi, mientras ku komo relevista ela uza su man robes.
Den luna di aprel Cijntje a hunga den shete wega di AquaSox. Ela kuminsá den kuater komo picher habridó. Su promedio di kareda limpi pèrmití ta di 6.75, anto ela ponchá 22 batiadó i a duna 16 ‘base por bolas’. Tur esaki den 17.1 ineng di trabou.
Den luna di mei Cijntje a kuminsá komo picher habridó den kuater wega. E tin komo tal un promedio di kareda limpi pèrmidtí 2.05. Ela poncá 20 batiadó i a duna 10 ‘base por bolas’.
Pa resumí, Cijntje den 11 wega tin un promedio di kareda limpi pèrmití di 4.12. Anto den 39,1 ineng ela ponchá 42 batiadó.