E fiesta di gol no a kaba den e torneo pa Kopa Kòrsou. Den wikènt tras di lomba e timnan ku a hunga a skor 58 gol. Den e kompetensia maskulino tin despues di 11 fecha di seri di weganan total 223 gol.
Kuater tim a gana nan kompromiso ku skor di 7 pa 0 den e wikènt. Esakinan ta Jong Holland riba djabièrnè, Jong Colombia riba djasabra i riba djadumingu Skèrpènè i Centro Deportivo Sta Rosa.
Jong Holland i Jong Colombia ainda no a pèrdè niun punto. Despues di nan viktoria di 7 pa 0 riba respektivamente Centro Hubenil Mahuma i De Koning, nan ta sigui invikto na kabes den pul D i pul E ku 12 punto for di kuater wega.
Skèrpènè tambe a demostrá su dominio ku un triunfo di 7 pa 0 riba Wishi Marchena. Ku su di tres viktoria i un empate anterior, e tim ta liderá grupo C ku 10 punto for di kuater wega.
Centro Deportivo Sta Rosa ku tambe a gana ku mesun skor (7 pa 0) di West Wolves United ta okupá e promé luga den grupo F ku 9 punto for di kuater wega. E tim tin tres triunfo i un derrota. Sinembargo Sta Rosa a hunga un wega mas ku Centro Dominguito ku ta na di dos puesto ku 7 punto for di tres wega: dos viktoria i un empate.
Atétiko Saliña tambe tabata produktivo den e kontinuashon dje torneo pa Kopa Kòrsou riba djasabra, logrando un viktoria di 6 pa 0 riba Stallions FC. Esaki tabata e promé triunfo pa e tim di Saliña den e kompetensia. E ta okupá e di tres lugá den grupo F ku 4 punto for di tres wega: un viktoria, un empate i un derota.
E torneo pa Kopa Kòrsou ta sigui djabièrnè ku 6 wega, esta dos wega den stadion Rignaal Jean Francisca na Brievengat, 2 enkuentro den stadion Dr Antoine Maduro na Kinchán i 2 wega den stadion Ergilio Hato di Sentro Deportivo Kòrsou (SDK) tambe na Brievengat.