Despues di tres buelta e weganan di ‘play-off’ den Diamond Stars League (DSL) ta kuminsá awe, djabièrnè anochi. Esaki ta tuma lugá den Sam Bunting Ballpark. E finalistanan ta Treasure, Phoenix, Nos Goso i The Fighters.
E kampionato di DSL ta destiná pa sòfbolistanan di 35 aña òf mas bieu. E kompetensia akí a kuminsá dia 14 di mart i ta dediká na Natalie Lourens i Gregory Lourens.
Sinku tim a kompetí den e kampionato di DSL. Despues di tres buelta Treasure a tèrminá na e promé lugá. E tim aki a gana 11 wega i a pèrdé 1. Rising Phoenix ku 10 viktoria i 2 derota a resultá e di dos mihó ekipo. Nos Goso a terminá na di tres puesto ku 4 viktoria i 8 wega pèrdí, siguí na di kuater lugá pa The Fighters ku 3 triunfo i 9 derota. Mas Goso a tèrminá na e di sinku lugá ku 2 viktoria i 10 wega pèrdí.
Number 1 Treasure i number 2 Phoenix ta topa otro den e promé wega di e play-off di DSL awe’nochi den Sam Bunting Ballpark na Brievengat. E enkuentro aki ta planiá pa kuminsá 8or. Pa kwartu pa 10 tin e wega entre Nos Goso i The Fighters.