E tim di FC Vesta a titulá kampion 2019 den kategoria Senior di futbòl femenino di Kòrsou. Den final e ekipo di Buena Vista i besindario a gana ku skor di 2-1 di Hubentut Fortuna.
Federashon Futbòl di Kòrsou (FFK) den simannan tras di lomba a organisá e kampionato femenino 2019. E kompetensia tabata den e respektivo kategorianan U15, U17 i Senior.
Den kategoria Senior Fc Vesta i Hubentut Fortuna tabata e ekiponan ku a enfrentá otro. E wega’ki a tuma lugá ayera riba tereno di FFK na Brievengat, tras di SDK.
Fc Vesta a sali viktorioso i a titulá kampion despues di gana Hubentut Fortuna ku skor di 2 pa 1. E gol di Fc Vesta a keda anotá pa Jully Lake i ta tin un outogol di Hubentut Fortuna, miéntras Riesmarly Tokaay tabata esun ku a anotá e gol pa e tim pèrdèdó.
