Un delegashon di Fundashon Desaroyo Deportivo Kòrsou (FDDK) ayera, djarason 14 di yüni 2017, a hasi un bishita na Fòrti. Durante e enkuentro aki representantenan dje fundashon a presentá e resolushonnan di e kongreso ‘Integrá, Aselerá, Elevá’ na Konseho di Minister di Kòrsou.
Den fin di siman di 8 pa 10 di yüni a tuma lugá e Kongreso di Deporte 2017 titulá ‘Integrá, Aselerá, Elevá’. Esaki tabata organisá pa FDDK i a tuma lugá den World Trade Centre (WTC) na Piskadera.
Tantu FDDK komo e partispantenan na e kongreso a kategorisá esaki komo eksitoso. FDDK via dje kongreso a ofresé un plataforma pa duna oportunidat pa integrashon multi-disiplinario, integrashon multi-deportivo i opinion multi-kultural, ku aksento riba edifikashon di nashon, esta ‘nation building’.
E kongreso a sirbi alabes pa konopá e diferente rekomendashon-, opinion- i inisiativanan di lidernan deportivo lokal. Esaki pa sirbi komo inspirashon pa akadémiko, profeshonal, atletanan i tambe tur lider ku ta aktivo direkto òf indirekto den mundu di deporte. E meta ta pa traha e siguiente 3 pa 5 aña ku tur nanishi den e mesun direkshon.
FDDK ta spera ku ministernan lo tuma bon nota dje resolushonnan presentá i purba di apliká esakinan den maneho inter-ministerial di forma ku den futuro komunidat por kosechá frutanan di esfuersonan realisá huntu. E konvikshon di FDDK ta: “ku un pueblo ku tin e motivashon, akseso i fasilidatnan pa por praktiká deporte, lo ta un pueblo ku ta biba i pensa salú i ta parti di un komunidat produktivo.”
Informe huntu ku foto:
Miembronan di delegashon di FDDK huntu ku ministernan di Gabinete Rhuggenaath den sala di Konseho di Minister den Fòrti.
Foto: FDDK