Sport.cw

Sponsored by

Sponsored by

Sponsored by

FDOK rumbo pa CAC 2018

Federashon Deporte Olímpiko Kòrsou (FDOK) awe, djadumingu 12 di novèmber 2017, a tene un kaminata titulá Rumbo pa CAC 2018. Esaki ta un aktividat pa entre otro akumulá fondo pa kubri gastunan di partisipashon di deportistanan lokal na Weganan Sentro Amerikano i di Karibe (CAC) otro aña.

E intenshon ta pa Kòrsou tambe partisipá na e próksimo weganan regional, esta CAC. Esaki ta tuma lugá na 2018 na Baranquilla, Colombia.

Kòrsou despues di un temporada ta kompetí atrobe den e weganan deportivo aki. Pa kubri parti dje gastunan enbolbí, FDOK a planiá algun aktividat pa krea fondo. E kaminata di awe mainta ta un dje eventonan aki. E intenshon ta tambe pa konsientisá pueblo mas aún dje ventahanan pa deportistanan lokal kompetí den regio.

E kaminata tabatin 2 distansia: 5 kilometer i 10 kilometer. Punto di salida i alabes final tabata na Colon, dilanti edifisio dje federashon. Minister Zita Jesus Leito representando kolega Marylin Alcalá-Wallé i presidente di FDOK Jean Fransisca a hiba palabra.

Partisipantenan ne kaminata, prensa i tambe otro personanan por a kombersá tambe ku algun dje deportistanan ku ya a klasifiká pa por kompetí na Baranquilla, Colombia.

 

Translate »