E tim ‘Vriendschap Eendracht Sterken Tegen Alles'(VESTA) a gana awe, djadumingu 12 di novèmber 2017, su promé wega den Liga MCB. Ela superá Centro Social Deportivo Barber ku 2-1.
E kampionato di Federashon Futbòl di Kòrsou (FFK) a kontinuá den wikènt ku 4 enkuentro. E kompetensia den promé divishon e temporada aki tambe ta tuma lugá den Stadion Antoine Maduro na Kintjan.
E promé wega di temporada tabata siman pasá djadumingu 5 di novèmber entre Union Deportivo Bandabou (Undeba) i Hubentut Fortuna. E tim di Bandabou a gana ku 4-0.
Den e di dos wikènt di kompetensia VESTA a gana awe djadumingu ku skor di 2-1 di Centro Barber. Vurger Bekeer a skor na di 15 minüt pa asina pone e tim di Buena Vista i besindario dilanti: 1-0. Despues di sosiegu, tabata Shurwendel Roosje ku a skor e di dos gol pa VESTA. Esaki tabata na di 56 minüt dje enkuentro.
E úniko gol di Centro Barber a kai na di 65 minüt dje wega. Michael Albertus a salba honor pe ekipo di Barber.
Riba djabièrnè Jong Holland tambe a logra su promé triunfo di temporada nobo den promé divishon di FFK, esta Liga MCB. E Trikolornan a superá Inter Willemstad ku skor di 2-0. E golnan a keda di skor pa Sebastian Londoño (39 minüt) i Randal Winklaar (85 minüt).
Riba djasabra tabatin dos enkuentro den Stadion Antoine Maduro. Esakinan a terminá den empate.
Den e promé wega djasabra Centro Dominguito i Victory Boys a trit e fanatikada riba 4 gol, 2 pa banda. E golnan di Centro Dominguito ku ta e aktual kampion di Kòrsou a keda di skor pa Norman Hoyer na di 24 minüt i Steward Sambo na di 54 minüt di wega. Pa Victory Boys a skor Gedion Schmidt na di 45 minüt i Sendley Bito na di 67 minüt di wega.
E enkuentro entre Jong Colombia i Scherpenheuvel a tèrminá sin gol: 0-0. Por konkluí ku e tim Saminero (Jong Colombia) a debutá riba bon pia den promé divishon kontra Skèrpènè ku t’e supkampion di Kòrsou.
Undeba, Jong Holland i VESTA tin pues 3 punto, Centro Dominguito, Victory Boys, Skèrpènè i Jong Colombia tin 1 punto i Hubentut Fortuna, Centro Barber i Inter Willemstad tin 0 punto.
E kampionato ta kontinuá próksimo wikènt ku atrobe weganan riba djabièrnè, djasabra i djadumingu. Lo tin 2 enkuentro riba tantu djasabra komo djadumingu.
