Ku e weganan di wikènt tras di lomba, Federashon Futbòl di Kòrsou (FFK) a sera e promé fase dje kampionato 2018/2019 den Liga MCB. Skèrpènè ta komandá e tabla di posishon ku 15 punto for di 5 enkuentro, miéntras ku Norvianel Naar di Union Deportivo Bándabou (Undeba) den e promé buelta tin te ainda mas tantu gol di skor: 8.
Porsierto ku Skèrpènè ta invikto i e úniko ekipo ku a gana tur su weganan ku ela hunga te ainda den promé buelta. E tim di fraternan a gana djabièrnè ku skor di 3-0 di Sport Unie Brion Trappers (SUBT).
Despues ku e promé tempu a transkurí sin gol, na di 61 minüt di wega Na-jir Penny a pone Skèrpènè dilanti 1-0. Yeremy Overman na di 87 minüt a hasi e skor 2-0, miéntras ku Freddy Hernandez den tempu di deskite (90+) a hinka e di tres gol pa e tim di fraternan.
Djasabra Jong Holland porfin a haña number di kas, ora ku ela gana di CVV Willemstad: 2-1. Esaki tabata danki na un outogol na di 58 minüt di wega di Tyndell Matheus dje tim di Kintjan. Na e momento ei e tim kampion di Kòrsou tabata ganá 1-0 danki na un gol trempan di Gersinio Constancia na di 3 minüt. Vylison Lake na di 80 minüt i via di pinalti a salba honor finalmente pa CVV Willemstad.
Den e otro wega riba djasabra Undeba a gana ku skor di 4-3 di Centro Social Deportivo Barber.Jurensly Martina na di 9 minüt a pone Barber dilanti (1-0), pero sinku minüt despues Norvianel Naar a empatá pa Undeba, miéntras ku na di 47 minüt e mesun hungadó a bolbe hinka gol: 2-1. Luchently Vrutaal na di 50 minüt a hasi e wega 3-1, miéntras ku nuebe minüt despues e tabata éksitoso atrobe: 4-1. Centro Barber no a entregá lihé i via di Sandy Cijntje (73 minüt) i Faron Troeman (83 minüt) a aserká te na 3-4.
Riba djadumingu e timnan di Vriendschap Eendracht Sterken Tegen Alles (VESTA) i Victory Boys a tabla na 1 gol. Tur dos gol a kai den di dos tempu via di pinalti. Cedricson Antonia na di 63 minüt a pone Victory Boys dilanti, miéntras ku Mirco Colina Jr na di 81 minüt a empatá e wega.
Den e otro enkuentro riba djadumingu Centro Dominguito a gana ku skor di 4-1 di Jong Colombia. Na di 43 minüt Oscar Vega a habri e skor pa e tim di Dominguito. Jean Carlos Torbed na di 60 minüt di wega a sòru pa e gol di empate: 1-1. Shayron Bernardus na di 79 minüt a pone Centro Dominguito 2-1 dilanti. Den final di wega Geryon Alberto (90 minüt) i Norman Hoyer (90+ minüt) a amplia e skor pa e tim eks kampion di Kòrsou.
Ku e último seri di weganan FFK ta tuma un pousa i e kampionato ta sigui otro aña 4 di yanüari ku e wega entre Centro Dominguito i VESTA. Skèrpènè ta drenta 2019 na kabes ku 15 punto for di 5 enkuentro: 5 viktoria. Ku 13 punto Centro Dominguito ta okupá e di dos puesto riba tabla di posishon: 4 triunfo i 1 wega tablá.