E torneo di futbòl pa Kopa Kòrsou a resultá te ainda den un fiesta grandi di gol. Den e último seri di weganan ku a hunga djamars último 20 di mei, tabatin 18 gòl. Tin total 165 gòl despues di ocho dia di wega den e torneo maskulino. Den e kompetensia femenino tin 9 gol te ainda den dos wega.
Dje wegnan den e último seri djamars anochi Centro Deportivo Sta Rosa a registrá e triunfo mas amplio. E tim di dos divishon a gana ku skor di 6 pa 1 di Stallions FC di terser divishon.
Skèrpènè di promé divishon a gana konvinsentemente ku skor di 4 pa 0 di Union Deportivo Tera Kòrá di dos divishon. Ku e viktoria aki e tim di fraternan ta kompartí de promé puesto den pul C ku FC Sithoc (di dos divishon), tur dos tim tin 7 punto.
Mas aleu SV New Song ku ta hunga den di dos divishon a derotá SV De Koning di tersera divishon ku skor di 3 pa 0. Danki na e triunfo akí, New Song a subi pa okupá e di dos posishon den pul E ku 6 punto. Den e pul akí e tim di Jong Colombia ta lider ku 9 punto.
Finalmente Centro Dominguito i Atlétiko Saliña, tur dos tim ta hunga den promé divishon, a empatá na 2 gol ku otro. E resultáto aki ta nifiká ku e tim di Saliña a logra su promé punto, mientras Centro Dominguito a seyá su di 7 punto i ta ubiká na e promé lugá den pul F, sigui pa Centro Deportivo Sta Rosa na e di dos lugá ku 6 punto.
Riba e di kuater dia dje torneo tabatin e kantidat mas grandi di gol: 28 total. Riba e di dos i tres dia di kompetensia a timnan a skor kada biaha 23 gol. Riba e di shete dia tabatin 21 gol, riba dia sinku 20, riba dia ocho 18, i riba e promé dia i di seis dia kada biaha 16 gol.
E wèpsait di deporte Wega di Bala Sport (WDBSport) ta indiká ku Ivanny Calvenhoven i Darlyson Ellensburg, tur dos di Jong Colombia, ta e lidernan goliadó aktualmente, kada un ku 7 gol. Alejandro Fernandez di Skèrpènè ta sigui nan di aserka ku 6 gol. Ashar Bernardus i Davidson Rosa, tur dos di Jong Holland, a skor te ainda 5 gol den e torneo pa Kopa Kòrsou.
Te ku awor den e torneo di futbòl femenino pa Kopa Kòrsou, a hunga solamente dos wega. Kuater team ta kompití pa e kopa aki. Excellence a gana ku skor di 2 pa 1 di Inter Willemstad, miéntras ku Hubentut Fortuna a superá Undeba ku skor di 5 pa 1. E torneo aki ta sigui awe, djaweps 22 di mei.
E torneo maskulino pa Kopa Kòrsou ta sigui mañan anochi, djabièrnè. Den Stadion Rignaal Jean Francisca e timnan di SV Indekor i Undeba ta hunga kontra di otro for di 7or, miéntras ku pa 9or tin programá e wega entre SV Vesta i Victory Boys.
Den Stadion Dr. Antoine Maduro, konosí tambe komo stadion di SUBT, na Kinchán ta FC Inter i Hubentut Fortuna ta hunga kontra di otro. E wega aki ta kuminsá 7or. Pa 9or tin e weg entre Centro Hubenil Mahuma i Jong Holland.