Den e wikènt tras di lomba tabatin un grandioso fiesta di gol den promé divishon di Federashon Futbòl di Kòrsou (FFK), esta Liga MCB. Un total di 21 gol a keda hinká den 5 enkuentro. Den e seri aki Jong Holland a fortifiká su posishon bulando alabes 30 punto.
E kampionato di futbòl a kontinuá djabièrnè anochi den Stadion Antoine Maduro, mihó konosí komo stadion di SUBT na Kintjan. Esaki ta despues ku tabatin un pousa pa motibu di fiestanan di karnaval.
Jong Holland a registrá su di 10 triunfo bulando alabes 30 punto. E tim Trikolor a gana ku skor di 3-0 di Victory Boys. Pues awor e Trikolornan a gana di tur sobrá ekipo den e kampionato. E tim di Nort Sapaté den promé buelta a empatá kontra e lidernan di kampionato.
Randall Winklaar ta sigui hinka gol pa Jong Holland. Ela skor dos biaha kontra di Victory Boys. Esaki tabata na apenas 1 minüt di wega i despues na 67 minüt. Jurensley Martina tambe a skor mediante un pinalti na di 45 minüt.
Djasabra Centro Social Deportivo Barber a goliá e tim Vriendschap Eendracht Sterken Tegen Alles (VESTA): 4-1. Na di 28 minüt Davidson Rosa a habri markadó i pone e ekipo di Barber dilanti. Ethelbert Daal dos minüt despues a empatá e wega pa e tim di Buena Vista i besindario.
E wega a bai sosegá 1-1. Den di dos tempu Barber a hinka tres gol. Esakinan tabata di Michael Albertus (58 minüt), Naigel Valorian (’66) i Daniel Rosa (’86).
Den e di dos enkuentro djasabra Inter Willemstad i Jong Colombia a parti punto: 2-2. Tabata parse ku Jong Colombia tabata bai gana e wega 2-1, pero faltando 2 minüt pé partido terminá Nathaniel Meyer ta skor e gol di empate pa e tim di Kintjan i Vredenberg.
Por sierto ku na apénas 1 minüt di wega, Aravely Suart di Jong Colombia ta sorprendé su mes kiper pa un outogol poniendo Inter Willemstad dilanti. Na di 27 minüt Jean Carlos Torbed ta empatá e partido 1-1 pa despues na di 80 minüt Rayandrick Carmelia pone e Samineronan 2-1 dilanti.
Finalmente awe djadumingu Union Deportivo Bándabou (Undeba) den e promé enkuentro a vapuliá Hubentut Fortuna ku skor di 6-2. Dexter Cicilia, Reunsley Leuteria i Luchently Vrutaal kada un a hinka dos gol pé tim di Bándabou, miéntras ku Rendel Girigorie i Luis Fruto Mirando a skor pa e ekipo di Seru Fortuna.
Den e di dos wega awe djadumingu Centro Dominguito den tempu di leshon ta logra gana di Skèrpènè. Por sierto ku e gol aki tabata for di un pinalti. Soranley Tomsjansen e kobrá esaki ku éksito.
