E promé wikènt di sòfbòl hubenil ta tras di lomba. Souax Gil’Sport 1 ta e úniko tim invikto. Ela gana djabièrnè di Sta Rosa Angels Vanddis 1 ku skor di 9-2, miéntras ku djasabra -17 di febrüari 2018- ela pasa tambe riba Pichingolo Nissan: 5-1.
Curaçaose Softball Bond (CSB) a ranka sali den wikènt ku e kampionato hubenil. Esaki ta konta ku partisipashon di 5 tim: Sta. Rosa Angels Vanddis 1 i 2, Souax Gil’Sport 1 i 2 i Pichingolo KIA/Nissan. Angels 1 ta aktual kampion i Souax 1 e supkampion.
Ta manera www.sport.cw a publiká for di djabièrnè, Souax Gil’Sport 1 a dal Sta Rosa Angels Vanddis ku skor di 9-2. Djasabra e tim di Souax a logra su di dos viktoria, derotando Pichingolo Nissan ku skor di 5-1.
Picher ganadó pa Souax tabata Kiara Domacassé. Dianthe Gibbes tabatin mihó sifranan di bateo pé tim ku 1 hit den 2 turno. Sinembargo tabata Stephmary Smith di Pichingolo Nissan ku a terminá komo mihó bateadó dje wega ku 2 hit den 2 turno.
Sta Rosa Angels Vanddis 2 a sali riba bon pia djasabra, ganando su ‘double header’ kontra di Souax Gil’Sport 2. E promé wega a terminá ku skor di 16-0 i e di dos 16-3.
Picher ganadó den e promé wega tabata Quin-Lin Coeriel, miéntras ku Stephany Carolis, Lisamari Irausquin i Joumely Wederfoort a bati 1 hit den 1 turno. Pa Souax Nadine Pardo tabatin 2 hit den 2 turno.
Den e di dos Ludnella Isenia a sali picher ganadó, miéntras ku Niharia Bronbill a sobresalí den bateo ku 2 hit den 3 turno. Pa Souax Yourivienne Nicolaas i Daisheline Daal tambe a kaba ku 2 hit den 3 turno na bate.
Awe djadumingu sinembargo Sta Rosa Angels Vanddis 2 a sufri dos derota den su ‘double header’ kontra Pichingolo Nissan: 4-13 i 13-14.
Den e promé wega picher Ashantely Alexandre a gana, miéntras ku Anais Piar a bati 2 hit den 2 turno. Pa Sta Rosa Angels Vanddis 2 e mihó bateadó tabata Richantely Elias ku 3 hit den 3 turno.
Picher ganadó den e di dos enkuentro pa Pichingolo Nissan a resultá Ashantely Alexandre, miéntras ku Anais Piar atrobe tabata tremendo na bate ku no menos ku 4 hit den 4 turno. Pa Sta Rosa Angels Vanddis 2 e mihó bateadó tabata Quin-Lin Coeriel ku 3 hit den 4 turno.
E último enkuentro awe tabata Sta Rosa Angels Vanddis 1 ku a gana ku skor abultá di 25-0 di Souax Gil’Sport 2. Picher ganadó a resultá Darlyse Salesia.
Despues dje promé wikènt e tabla di posishon ta: 1. Souax Gil’Sport 1 ku 2 triunfo sin derota, 2. Pichingolo Nissan ku 2 wega ganá i 1 pèrdí, 3. Sta Rosa Angels Vandiss 2 ku 2 viktoria i 2 derota, 4 Sta Rosa Angels Vanddis 1 ku 1 triunfo i 1 derota i den bòm Souax Gil’Sport 2 ku 3 derota sin viktoria.
