The Fighting Team ayera, djarason 22 di sèptèmber, a bolbe logra un triunfo den kontinuashon dje kampionato regular di sòfbòl fast pitch femenino. E tim e biaha’ki a derotá Fenix Softex ku skor di 12 pa 1, despues ku un dia promé ela triunfá ku 11 pa 1 riba Sta Rosa Angels.
Direktiva di Curaçaose Softball Bond (CSB) a sigui ayera ku e kompetensia di sòfbòl femenino den divishon superior, esta Liga MCB-CSB. Esaki a tuma lugá den Sam Bunting Ballpark na Brievengat.
The Fighting Team a pasa ku relative fasilidat rib Fenix, propinando e tim aki un nòkout: 12 pa 1. Picher Libris Hurtado Payares a gana, miéntras ku Sharon-Rose De Lanoi a sobresalí na bate ku 2 hit den 2 turno.
Picher Shurdaney Obispo a sufri e derota. Joanni Benita tabatin un anochi perfekto na bate pa e tim pèrdèdó ku 1 hit den 1 turno.
The Fighting Team pues a skor 12 kareda riba solamente 3 hit i a komete 1 eror. Fenix Softex tabatin 1 kareda, 2 hit i 4 eror.
Tabatin tambe un wega den divishon A di CSB. Den e promé wega Sta Rosa Vanddis a gana ku skor di 6 pa 0 di Rising Trotters. Danisha Salesia a resultá picher ganadó i e mihó batiadó tabata Yudiluz Salcedo ku a kada wega ku 3 hit den 4 turno. Pa Rising Trotters e picher pèrdèdó tabata Jacqueline Sophia i mihó bate Thianeysha Martis Vicento ku 1 hit den 2 turno (2-1).
E kampionato ta sigui awe nochi na Sam Bunting Ballpark ku Finex Softex kontra Sta Rosa Angels Vanddis den divishon superior. E wega aki ta kuminsá 9or. Den divishon A tin 7or e enkuentro entre Walk of Warriors i Souax Treasure.
