Mary-Ann Mac Leod pa di dos aña konsekutivo a klasifiká pa final den den divishon B di Federashon di Tènis di Mesa Kòrsou (FTMK). E biaha aki Cai Walters ta su kontrinkante, ku por sierto den semi final a eleminá e kampion Dik Hendriks.
E kompetensianan di FTMK a sigui ayera, djarason 20 di novèmber 2019, ku e weganan preliminar i semi final den divishon B. Tabatin anteriormente tambe e seri di weganan den divishon A, kaminda ku Devon Meilink i Dimitri Leon a pasa pa final.
FTMK e aña aki ta dedika e weganan dje kampionato nashonal na Onny Wong. E ta un dje balaurtenan den e deporte aki i ta un persona ku pa hopi aña a praktika pinpòn i algun aña pasá tabata yuda hopi persona, speshalmente damanan ku kier a siña hunga e deporte. Hopi ta gradesido tambe na su persona pa a siña hopi teknika.
Un total di 14 hungadó a kompetí djarason den e kompetensia balido pa divishon B. E mihó dos hungadónan di kada grupo a sigi pa e seri di weganan den kwart final i despues semi final. E semifinalistanan tabata Fawzy Ayubi, Cai Walter, Dik Hendriks i Mary Ann Mac Leod komo úniko hungadó femenino.
Den semi Walters a gana ku skor di 3-0 di Hendriks. Ku e viktoria aki ela eleminá e kampion di 2018. E parsialnan tabata 11-8, 11-5 i 11-7.
Den e otro seri Mac Leod tabatin mester di 4 sèt pa superá Ayubi den un enkuentro duru bringá. Despues di a pèrdè e promé sèt ku skor di 8-11, e úniko hungadó femenino den kontienda a bin duru i gana e sigiuente tres sètnan ku parsialnan di 11-6, 11-9 i 12-10.
Pues awor mañan djabièrnè e final ta bai ta entre Walters i Mac Leod ku aña pasá a pèrdè den final kontra di Hendriks. E seri aki ta kuminsá 8or di anochi.
Despues ta sigui final di dòbel ku ta bai entre e Devon Meilink/Henny Metry i Dimitri Leon/Jaysron Mathilda.
E di tres evento e anochi aki lo ta final den kategoria Master 50+ ku ta bai entre e rivalnan di ultimo tempu den e kategoria aki, esta Raymond Begina kontra Hensley Wentwoord.
Komo ultimo lo bai tin e parti mas interesante ku e titulo di Kòrsou den tapara. Dimitri Leon ta bai pa su di tantisimo titulo kontra Devon Meilink ku ta kampeon di 2015.
E weganan final ta tuma lugá den Sala Rekreo Irene Moreno na Muizenberg, banda di Cine Rio i Little League Ball Park.
