E kampionato di vòlibòl di Kòrsou a kontinua awenochi den Sala Errol Rooi di Sentro Deportivo Kòrsou (SDK), kaminda ku Shuatanari i Xaverianen a gana di nan kontrinkantenan. Apesar ku tur dos a gana ku skor di 3-0, e weganan tabata di bon nivel i ku e timnan pèrdèdo dunando tur ku tin.
Den divishon femenino superior Shuatanari a presentá inspirá i a derotá Jumping Jewels ku skore di 3-0, ku parsialnan di 25-16, 25-15 i 25-17. Jumping Jewels tin un tim pa futuro i for di awor a demonstrá su potensial. E hoben volibolistanan a skor 15 punto of mas den tur e sètnan kontra Shuatanari, ku ta e sup kampion di Kòrsou
Den divishon maskulino superior Xaverianen a demostrá su klase atrobe superando Wishi Tigers ku skor tambe di 3-0. E parsialnan tabata 25-13, 25-19 i 25-18. Den e último sèt Whishi Tigers a rebeldiá un ratu i asta a kue un bon ventaha, pero Xaverianen a para e fiesta i paga tur lus den Wishi i Marchena.
E kampionato di vòlibòl ta kontinua diadumingu awor ku un kalendario kompletu. Pa 5or e show ta start ku e promé wega den klase femenino superior ora ku Xaverianen lo enfrenta Jumping Jewels i na mes momentu Titus i Stakamahakchi ta batayá kontra otro den maskulino superior. Mas lat Huricane i Stakamahakchi ta enfrenta otro den divishon femenino, mientras e ultimo wega ta entre Wishi Tigers i Warwaru.
