Federashon Tènis di Mesa Kòrsou (FTMK) a honrá e legendario hungadó Robert Hose ku un bunita selebrashon. Ela kumpli 70 aña i tabata presente na e enkuentro. Tambe tabatin torneo hubileo STENS’73 ku Franklin Lopez di Aruba a gana, miéntras ku RapidTronic di Kòrsou a gana e torneo di fogeo entre timnan di Aruba i Kòrsou.
Hungadónan di tènis di mesa tabatin un siman i wikènt okupá den sala di rekreo Irene Moreno na Muizenberg. Tabatin dos torneo i un selebrashon tur afó pa e legendario Robert Hosé, ku ten su ten a gana hopi titulo lokal, Antiano i tabata tambe éksitoso den eksterior.
Tabata un anochi plasentero ku komo invitado di honor Robert Hose mes huntu ku tur esnan ku den e tempunan di gloria aya, a gosa di su tremendo aktuashon. Fuere di prensa lokal i Hulandes, tabatei presente tambe hungadónan di Aruba di su epoka manera e rumannan Alfred i Winchow Leong. Tambe a honrá Hose hungadónan di Bonaire i hungadónan lokal di antes manera entre otro Frank Mathilda, Raymond Begina, Maggy Sprock, Edith Mac Leod, Magda Hansen Luti i Eric Isenia.
Raymond Begina ku ainda ta hunga, durante e selebrashon a bai bèk den añanan 70 i konta diferente historia, speshalmente di nan viahe i partisipashon den eksterior ku e ekipo STIGA, ku despues a bira STENS ‘73. Despues ku a kanta ‘Happy Birthday’ pa Robert Hose, tabatin partimentu di bolo pa tur presente. Dado momento Hose ku a risibi diferente regalu, a yena di tantu emoshon.
Mas aleu tabatei presente na e selebrashon pa Robert Hose tambe un ekipo di televishon enkabesá pa Michel Drenthe i Debora Noordwijk. E tim aki tin vários tempu kaba trahando riba un dokumentario riba bida i karera deportivo di Robert Hose.
Aparte dje selebrashon tabatin tambe torneo STENS’73 ku a konta ku 24 inskripshon di kua 4 hungadó di Aruba i 1 di Bonaire. E hungadónan di Aruba tabata e rumannan Alfred i Win Chow Leong, Franklin Lopez i James Letren i di Bonaire Freddy Beukenboom.
E torneo STENS’73 tabatin 8 grupo di 3 di kua e Arubanonan a enkabesa 4 grupo, un enkabesá pa Bonaire i e sobra 3 gruponan enkabesá pa Kòrsou. E sigiuente resultadonan tabatin den kuartfinal: Raymond Begina (Kòrsou) vs Jacinto Zimmerman (Kòrsou) 3-0, Alfred Leong (Aruba) vs Hensley Wentwoord (Kòrsou) 3-1, Franklin Lopez (Aruba) vs James Letren (Aruba) 3-1 i Freddy Beukenboom (Bonairte) vs Win Chow Leong (Aruba) 3-0.
E ganadonan a sigi pa semi final ku e siguiente resultadonan: Raymond Begina (Kòrsou) vs Freddy Beukenboom (Bonaire) 3-1 i Franklin Lopez (Aruba) vs Alfred Leong (Aruba) 3-2.
Asina e final a bai entre hungadó di Aruba kontra Korsou den personanan di Franklin Lopez i Raymond Begina. Lopez a mustra su superioridat riba Begina pa asina bai ku e maksimo premio di e torneo aki, ganando ku skor di 3-1. E parsialnan tabata 8-11, 11-7, 12-10 i 11-3.
Finalmente tabatin tambe un torneo fogeo pa tim entre Aruba i Korsou. Aruba tabatin Aruba-1 forma pa Franklin Lopez i Alfred Leong i Aruba-2 ku e hungadónan Win Chow Leong i James Letren. Korsou di su banda a bin ku Hairburst forma pa Devon Meilink i Corne Klopper i RapidTronic ku Dimitri Leon i Ravi Rajwani. Hairburst ta gana di Aruba 3-0, mientras RapidTronic ta gana Aruba 2 ku e skor di 3-1. Den final RapidTronic ta kleim e titulo kampionil ganando di Hairburst ku skor di 3-1.
