Federashon Futbòl Kòrsou (FFK) tin ofisialmente un presidente nobo. Esaki ta Gilbert Martina ku ta èks direktor di Curaçao Medical Center (CMC). Klùpnan ayera djaweps 10 di aprel pa aklamashon a elegi’é i tambe e otro miembronan den e direktiva nobo pa e periodo di 2025 te ku 2029.
Gilbert Martina ta haña sosten den e direktiva nobo di Fabi Constansia komo vise presidente di FFK. E otro miembronan di direktiva ta Kenneth ‘Bob’ Bernabela, Rudsel Schmidt, David Heykoop, Ludwig ‘Luti’ Alberto i Ronny Potmis.
E direktiva nobo ta pone hopi énfasis riba rekonstruí konfiansa entre tur aktor den e mundu di futbòl lokal. Esakinan ta entre otro miembronan di direktiva, empleadonan di FFK, klupnan afiliá, rèfrinan i otro stakeholdernan. Konfiansa ta e fundeshi pa move huntu den un direkshon di progreso.
Un otro punto importante ta komunikashon. E direktiva kier mantené un komunikashon habrí i proaktivo ku tur miembro i tambe ku e medionan di komunikashon, pa yega na un bon diálogo i transparensia.
Mas aleu bon gobernashon korporativo (Good Corporate Governance) ta un balor fundamental pa e direktiva nobo. Tur desishon i akshon lo tuma lugá segun e regla i statutonan vigente di FFK, ku klaridat den liderato.
E direktiva ta konsiente di e desafionan aktual den nos futbòl lokal. Prioridat prinsipal ta pa reaktivá e kompetensia di futbòl lokal. E meta ta pa kuminsá e temporada 2025/2026 den ougùstùs òf sèptèmber dje aña’ki mes. Promé ku esaki ta intenshon pa tene den luna di mei, yüni i yüli dje aña’ki tambe un torneo pa klupnan di promé, di dos i terser divishon.