E selekshon nashonal di fútbol di Kòrsou ta kuminsá e di 18 edishon dje tornéo di Concacaf pa Gold Cup kontra El Salvador. E wega akí ta tuma lugá dia 17 di yüni den PayPal Park na San Jose, California.
Kòrsou ta hunga den grupo B hunto ku El Salvador, Honduras i Canada. E selekshon di Canada ta faborito prinsipal pa sali ganadó dje grupo akí.
Después dje wega di apertura kontra El Salvador, selekshon di Kòrsou bou di direkshon di Dick Advocaat ta hunga kontra Canada riba 21 di yüni. Despues e tim lokal ta topá ku Honduras dia 24 di yüni.
E number 1 i 2 di kada grupo ta pasa pa kwartfinal dje tornéo di Concacaf pa Gold Cup 2025. Un total di 16 selekshon ta partisipá den kompetensia akí. Nan a dividí e timnan den kwater grupo.
Den grupo A ta hunga México, Costa Rica, Surnam i Repúblika Dominikana. Den grupo B pues ta Canada, Honduras, El Salvador i e selekshon di Kòrsou. Den grupo C tin Panamá, Jamaica, Guatemala i Guadelup. E selekshonnan di Merka, Haïti, Trinidad & Tobago i Arabia Saudita ta hunga kontra otro den grupo D.
E weganan den kwartfinal ta tuma lugá riba dianan 28 i 29 di yüni. Después di esaki tin e weganan di semifinal riba dia 2 di yüli i e final ta riba djadumingu 6 di yüli.
